Endi onlaın nesıeni 5 mınýtta alýǵa bolmaıdy
ASTANA. KAZINFORM — Tutynýshylyq kepilsiz onlaın-kredıtterdi resimdeý kezinde «sheshim qabyldaý kezeńi» engiziledi, bul shartqa qol qoıylǵan sát pen kredıtti naqty berý arasyndaǵy merzim. Endi kredıt osy merzim ótkennen keıin jáne qaryz alýshynyń ony berýge kelisimin alǵannan keıin ǵana berilýi múmkin.
Prezıdent 2025 jylǵy 30 maýsymda qol qoıǵan «Qazaqstan Respýblıkasynyń keıbir zańnamalyq aktilerine qarjy naryǵyn damytý, qarjylyq kórsetiletin qyzmetterdi tutynýshylardyń quqyqtaryn qorǵaý, baılanys jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» zańda kepilsiz tutynýshylyq kredıtter alý kezinde azamattardy qorǵaýdyń jańa tetikteri kózdelgen.
- Tutynýshylyq kepilsiz onlaın-kredıtterdi resimdeý kezinde «sheshim qabyldaý kezeńi» engiziledi, bul shartqa qol qoıylǵan sát pen kredıtti naqty berý arasyndaǵy merzim. Endi kredıt osy merzim ótkennen keıin jáne qaryz alýshynyń ony berýge kelisimin alǵannan keıin ǵana berilýi múmkin. Asyp ketken kezde «sheshim qabyldaý kezeńi» qoldanylatyn kredıttiń eń tómen mólsheri, sondaı-aq qaryz alýshynyń kredıt alýǵa kelisim berý tártibi Qarjy naryǵyn retteý jáne damytý agenttiginiń normatıvtik quqyqtyq aktisinde aıqyndalatyn bolady, - delingen Qarjy naryǵyn retteý jáne damytý agenttigi habarlamasynda.
Bul normanyń maqsaty tutynýshylardyń quqyqtaryn qorǵaýdy arttyrý jáne azamattardyń alaıaqtyq shemalarǵa tartylý táýekelderin azaıtý.
- Kepilsiz tutynýshylyq kredıt alýǵa alǵash ret júgingen azamattar úshin bank bólimshesine nemese mıkroqarjy uıymyna mindetti túrde óziniń barý talaby belgilenedi. Adamnyń óziniń barýyn talap etetin kredıttiń eń tómen mólsheri de Agenttiktiń normatıvtik quqyqtyq aktisinde aıqyndalatyn bolady.
21 jasqa tolmaǵan jáne 55 jastan asqan azamattardyń jekelegen sanattaryna olardyń kelisimi alynǵannan keıin ǵana kepilsiz tutynýshylyq kredıtter beriledi. Kredıtti onlaın alýǵa júgingen kezde kelisim «elektrondyq úkimet» portaly, kredıttik bıýro ne kredıtordyń «elektrondyq úkimet» shlıýzinde ornalastyrylǵan servıstermen yqpaldastyrylǵan qosymshasy arqyly resimdeledi, - delingen habarlamada.
Zań alaıaqtyq jolmen resimdelgen kredıtter boıynsha bereshekti sottan tys jáne sot arqyly esepten shyǵarýǵa bolatyn negizderdi de keńeıtedi.
Sottan tys esepten shyǵarý mynadaı talaptardy buza otyryp berilgen kredıtti alaıaqtyq jolmen resimdeýge baılanysty qylmystyq is boıynsha qaryz alýshyny quqyq qorǵaý organdarynyń qaýlysy bolǵan kezde jábirlenýshi dep tanýǵa bolady:
— jańa qaryz alýshylardyń sharttar jasasý kezinde kredıtor bólimshesine jeke barýy;
— azamattardyń jekelegen sanattarynyń kelisimin alý;
— kredıtter berý kezindegi «sheshim qabyldaý kezeńi»;
— shart jasasý kezinde bıometrııalyq sáıkestendirý.
Eger:
— klıenttiń sáıkestendirý quraldaryn úshinshi tulǵanyń zańsyz alýy jáne paıdalanýy, onyń ishinde banktiń nemese mıkroqarjy uıymynyń qyzmetterin qashyqtan kórsetýdiń baǵdarlamalyq qamtylymyn qashyqtan basqarýdy paıdalaný arqyly kredıtti resimdeý kezinde;
— banktiń, mıkroqarjy uıymynyń bıometrııalyq sáıkestendirýdi júrgizý tártibin buzýy;
— Agenttiktiń normatıvtik quqyqtyq aktisinde belgilengen ishki jáne syrtqy alaıaqtyq faktilerin anyqtaý, bekitý jáne taldaý jónindegi talaptardy buzý nátıjesinde resimdelgen alaıaqtyq kredıt sot arqyly esepten shyǵarylýy múmkin.
Zańda bankterdiń mynadaı qosymsha ókilettikteri de kózdelgen:
Alaıaqtyq belgileri bar operatsııalar anyqtalǵan kezde banktik shot nemese elektrondyq ámııan boıynsha shyǵys operatsııalaryn 5 jumys kúnine deıingi merzimge ýaqytsha toqtata turý;
Eger olar nemese olardyń kontragentteri Antıfrod-ortalyqtyń derekqoryna engizilgen bolsa («qara tizim»), operatsııalardy qabyldamaý jáne klıentterge qyzmet kórsetýdi shekteý.
Joǵaryda kórsetilgen talaptar kúntizbelik 90 kún ótkennen keıin kúshine enetin sheshim qabyldaý kezeńin qoldaný jónindegi talapty qospaǵanda, resmı jarııalanǵannan keıin kúntizbelik 60 kún ótken soń kúshine enedi.
Aıta ketelik kredıtter men lızıngti sýbsıdııalaý qaǵıdasy ózgergen edi.