Endi onlaın nesıe almas buryn 7 suraqqa jaýap berýge týra keledi
ASTANA. KAZINFORM — Qarjy naryǵyn retteý jáne damytý agenttigi 2026 jylǵy 1 qazannan bastap tutynýshylyq kepilsiz onlaın-qaryzdar resimdeý kezinde qaryz alýshy-jeke tulǵalardan saýalnama alýdyń engizilgeni týraly habarlady.
Qaryz berýdiń aldynda bankter men mıkroqarjy uıymdary azamat alaıaqtardyń áserinen qaryz alyp, sodan keıin alynǵan aqshany úshinshi tulǵalarǵa aýdaratyn alaıaqtyq qaryzdyń resimdelýine jol bermeý úshin klıentterge saýalnama júrgizedi.
Saýalnamada jeti suraqtan turady. Qaryz alýshydan kredıtti resimdeýdi kim usynǵany, kredıt alý úshin óziniń derbes túrde nemese úshinshi tulǵalardyń ótinishi boıynsha júgingeni, qaryzdyń qandaı maqsattarǵa resimdelip jatqany, sharttyń negizgi talaptarymen tanysqany ne tanyspaǵany, áldekimniń qysym jasap jatqany nemese qaryz resimdeýge asyqtyryp jatqany, oǵan kredıt resimdeý faktisin bank qyzmetkerlerinen nemese týystarynan jasyrýǵa keńes berilgeni ne berilmegeni týraly, sondaı-aq, osyǵan deıin «aqshany qorǵaý» nemese «shot boıynsha operatsııalardy tekserý» týraly usynyspen qońyraýlardyń bolǵany ne bolmaǵany týraly suraıdy.
— Saýalnama nátıjesi boıynsha yqtımal alaıaqtyq nemese qaryzdy úshinshi tulǵalardyń yqpalymen resimdeý belgileri anyqtalǵan kezde bank qaryz alýdyń mán-jaılaryna qosymsha tekserý júrgizedi, onyń ishinde qaryz alýshyǵa yqtımal alaıaqtyq áreketterge baılanysty táýekelder týraly qosymsha habarlaıdy. Tekserý nátıjesi boıynsha qarjy uıymy shart jasaý, anyqtalǵan mán-jaılar joıylǵanǵa deıin ony jasaýdy toqtata turý ne shart jasaýdan bas tartý týraly sheshim qabyldaıdy, — delingen agenttik taratqan aqparatta.
Jańa talaptar bıometrııalyq aýtentıfıkatsııany, qomaqty onlaın-qaryzdar berý kezindegi «sheshim qabyldaý kezeńin» jáne qaryzdar men mıkrokredıtter alýdan erikti túrde bas tartý múmkindigin qosa alǵanda, alaıaqtyq kredıt berýge qarsy is-qımyl jónindegi qoldanystaǵy sharalardy tolyqtyrady.
Osyǵan deıin bank qaıtys bolǵan adamnyń týystarynan nesıeni óteýdi talap ete ala ma degen saýalǵa jaýap izdegen edik.
