Endi notarıýstyń atqarýshylyq jazbasyn onlaın alýǵa bolady

ASTANA. KAZINFORM — Elimizde notarıýs qyzmetin tsıfrlandyrý sheńberinde atqarýshylyq jazba elektrondyq formatqa kóshirildi. Bul týraly Ádilet mınıstrliginiń resmı ókili Talǵat Ýálı málim etti.

— Notarıýstyń atqarýshylyq jazbasy — bereshekti májbúrlep óndirý qujaty. Demek qaryz nemese múlikti óndirip alý úshin notarıýs arnaıy belgi, ıaǵnı atqarýshylyq jazba beredi. Eger qaryz berý nemese alý sharty notarıatta kýálandyrylǵan bolsa, sotqa emes, tikeleı sot oryndaýshysyna júgine alady, — dep túsindirdi Talǵat Ýálı.

Resmı ókildiń aıtýynsha, atalǵan jańashyldyq azamattardyń shyǵynyn azaıtyp, ýaqytyn únemdeý úshin, sondaı-aq qyzmet sapasyn arttyryp, tsıfrlyq júıeni engizý maqsatynda qabyldanǵan sheshim.

— Buǵan deıin notarıýstar atqarýshy jazbany qaǵaz túrinde berip keldi. Endi notarıattyq atqarýshylyq jazba elektrondyq formatta resimdeledi. Ol úshin notarıýstyń elektrondyq tsıfrlyq qoltańbasy jetkilikti, ıaǵnı zańdy kúshi bar. Aıta ketetin jaıt, qarsylyq bolǵan jaǵdaıda notarıýs atqarýshylyq jazbanyń kúshin joıýǵa mindetti, — deıdi ol.

Mınıstrlik málimetine súıensek, bıyl 31 naýryzdan beri 32 myńnan astam atqarýshylyq jazbanyń kúshi joıyldy.

Eske salaıyq, bıyl sáýirde Ádilet mınıstrligi «Tsıfrlyq atqarýshylyq jazba» pılottyq jobasyn iske qosty.