Endi naýqas pen memleket dáriniń aqysyn birlesip tóleıdi
ASTANA. KAZINFORM – QR Densaýlyq saqtaý mınıstrligi 2026 jyldan bastap ambýlatorııalyq dári-dármekpen qamtamasyz etýdiń jańa tetigin iske qospaq. Bul týraly Dári-dármek saıasaty departamentiniń basqarma basshysy Jibek Joly arnasynyń «Búgin LIVE» baǵdarlamasyna bergen suhbatynda málimdedi.
– Birlesip tóleý júıesi boıynsha patsıent dári-dármektiń belgili bir mólsherin tóleıdi, al qalǵan bóligi memleket qarjysy esebinen óteledi. Naýqastar Densaýlyq saqtaý mınıstrligi bekitken shekti baǵa men ózderi tańdaǵan preparat qunynyń arasyndaǵy aıyrmashylyqty ǵana tóleıdi, – deıdi Gúldeı Begalıeva.
Jańa júıe qazaqstandyqtardyń ómir súrý jasyn uzartýǵa baǵyttalǵan.
– Bul jobanyń maqsaty – patsıentterdiń emdelýge beıimdiligin arttyrý, olardyń ómir súrý sapasyn uzartý, sondaı-aq múgedektik pen ólim qaýpiniń aldyn alý. Jobanyń basty artyqshylyǵy — patsıentterge dári-dármekti tańdaý quqyǵy beriledi. Oǵan qosa ambýlatorlyq deńgeıde dári-dármekpen tegin qamtý júıesi saqtalady jáne qosymsha naýqastar jeke dárihanalarda ózderi tańdaǵan dárilik zattardy satyp ala alady, – deıdi mınıstrlik mamany.
Densaýlyq saqtaý mınıstrliginiń málimetinshe, bıyl arterıaldyq gıpertenzııamen aýyratyn naýqastarǵa basa nazar aýdarylyp otyr.
– Qazirgi ýaqytta ambýlatorlyq deńgeıde 3 mıllıonnan astam patsıent tegin dári-dármekten qamtamasyz etilip jatyr. Onyń ishinde 1,2 mıllıony – arterıaldyq gıpertenzııamen aýyratyn naýqastarǵa arnalǵan dári-dármekter, – deıdi Dári-dármek saıasaty departamentiniń basqarma basshysy.
Aıta keteıik, 2026 jyly ambýlatorııalyq dári-dármekti jeke dárihanalar arqyly usyný múmkin bolady.