Endi muǵalimderdi medıtsınalyq saqtandyrýda másele týyndamaıdy
ASTANA. KAZINFORM – Oqý-aǵartý mınıstrligine keıbir muǵalimderdiń jazǵy kanıkýl kezinde MÁMS-ke tólenetin úsh aılyq jarnanyń birden aýdarylýy saldarynan medıtsınalyq mekemelerge qaralý múmkindiginen aıyrylatyndyqtaryn aıtyp, resmı saýal joldaǵan edik. Vedomstvo mundaı kemshiliktiń joq ekenin alǵa tartyp otyr.
«Mindetti áleýmettik medıtsınalyq saqtandyrý týraly» Qazaqstan Respýblıkasy Zańy (budan ári — Zań) 30-babynyń 1-tarmaǵyna sáıkes, jumyskerlerdiń, onyń ishinde memlekettik jáne azamattyq qyzmetshilerdiń aýdarymdaryn jáne (nemese) jarnalaryn esepteýdi (ustap qalýdy) jáne aýdarýdy jumys berýshi aı saıyn júzege asyrady. Zańnyń 30-baby 1-1-tarmaǵyna sáıkes, biryńǵaı tólem tóleýshiler Salyq kodeksi 776-4-babynyń 5-tarmaǵynda belgilengen merzimde qorǵa aýdarym men jarna tóleıdi», — dep atap ótedi mınıstrlikten.
Vedomstvonyń málimetinshe, Salyq kodeksi 776-4-babynyń 5-tarmaǵyna sáıkes, salyq agenti esepke jazylǵan kiris boıynsha biryńǵaı tólemdi ekinshi deńgeıdegi bankter nemese bank operatsııalarynyń jekelegen túrlerin júzege asyratyn uıymdar arqyly jalpy somamen aı saıyn, esepti aıdan keıingi aıdyń 25-kúninen keshiktirmeı, «Azamattarǵa arnalǵan úkimet» memlekettik korporatsııasynyń banktik shotyna osyndaı biryńǵaı tólem aýdarylatyn aıdy kórsete otyryp aýdarady.
«Joǵaryda baıandalǵannyń negizinde bilim berý uıymdary pedagogterdiń demalys kezeńi úshin aýdarymdaryn jáne (nemese) jarnalaryn, onyń ishinde MÁMS jarnalaryn esepteýdi (ustap qalýdy) jáne aýdarýdy jalpy somamen aı saıyn, esepti aıdan keıingi aıdyń 25-kúninen keshiktirmeı tólem aýdarylatyn aıdy kórsete otyryp júrgizetinin málimdeımiz», — dep naqtylaıdy mınıstrlikten.
Alaıda, medıtsınalyq saqtandyrý qory uzaq demalys kezinde qyzmetkerlerdiń saqtandyrylǵan mártebesin saqtaýǵa kepildik berý úshin ózgerister engiziletindigin habarlady.
«MÁMS týraly» zańǵa saı jumys berýshi aı saıyn áleýmettik medıtsınalyq saqtandyrýǵa qyzmetkeri úshin aýdarymdar men jarna tóleýi tıis. Bir aıda aýdarym bolmaǵan jaǵdaıda qyzmetker MÁMS júıesindegi saqtandyrylǵan mártebesinen aırylady. Osyǵan qaramastan, Qazaqstannyń keıbir óńirleri men jekelegen salalarynda bul tólemdi aılarǵa bólmeıdi jáne qyzmetker medıtsınalyq qyzmet alýǵa júgingen kezde saqtandyrylǵan mártebesiniń joǵalǵanyn anyqtaıdy. Atap aıtqanda, keıbir muǵalimder, taý-ken kásiporyndarynyń qyzmetkerleri jáne vahtalyq ádispen jumys isteıtinder osyndaı jaǵdaıǵa tap bolady», — degen edi qordan.
Áleýmettik medıtsınalyq saqtandyrý qory osy máseleni sheshý úshin Densaýlyq saqtaý mınıstriniń MÁMS-ke aýdarym jáne/nemese jarna aýdarý erejesi men merzimi týraly buıryqqa tolyqtyrý engizýge bastamashy bolyp otyr.
Qor atalǵan qujat mátininde «aqyly eńbek demalysy kezeńindegi tabysty esepteý kezinde aýdarymdar men jarnalar demalys kúnderiniń sanyna barabar eseptelgen kezeńder boıynsha bólek aýdarylatynyn» naqtylaýdy usynady.
Qazirgi ýaqytta bul usynys ýákiletti ortalyq memlekettik organdardyń qaraýynda jatyr.
Tolyqtyrý qabyldanǵan jaǵdaıda uzaq merzimdi aqyly eńbek demalys kezinde qyzmetkerlerdiń saqtandyrylǵan mártebesin joǵaltý máselesi sheshilmek.
