Endi Mılanda ótetin qysqy Olımpıadaǵa daıyndalamyz - Sherzod Hashırbaev
ıABÝLI.KAZINFORM – Frıstaıl-akrobatıkadan Qazaqstan ulttyq quramasynyń múshesi, Harbın qysqy Azııa oıyndarynyń altyn medal ıegeri Sherzod Hashırbaev marapattaý rásiminen keıin Kazinform tilshisine eksklıýzıvti suhbat berip, óz áserimen bólisti.

Sportshynyń aıtýynsha, jarys alańynyń sapasy óte jaqsy bolǵan.
– Kóńil kúı óte tamasha. Jalpy jarys oıdaǵydaı ótti. Bul jerdiń aýa raıy jáne qardyń sapasy kóńilimizden shyqty,- dedi ol.
Ol sonymen qatar qoldaý birgen barsha qazaqstandyqtarǵa alǵys aıtyp, aldaǵy josparlary týraly áńgimelep berdi.
– Basty maqsat - 2026 jyly Mılanda ótetin qysqy Olımpıada oıyndary. Jalǵasty jattyǵýdy jalǵastyryp, Olımpıada oıyndaryna joldama alýǵa bar kúshimizdi salamyz,- deıdi Sherzod.
Aıta keteıik, frıstaıl-akrobatıkadan Qazaqstan ulttyq quramasy Harbın qysqy Azııa oıyndarynda el qorjynyna tórt medal syılady. Olardyń qatarynda, Sherzod Hashırbaev jáne Roman Ivanov frıstaıl-akrobatıkadan erler arasynda sınhrondy sekirý synynda 97.92 upaı jınap, el qorjynyna ekinshi altyn medal syılady.
Sonymen qatar, qazaqstandyq qyzdar Ardana Mahanova jáne Aıana Joldas frıstaıl-akrobatıkadan áıelder arasynda sınhrondy sekirý synynda 59.16 upaı jınap, úshinshi orynan kórindi.
Aralas komandalyq synda, otandastarymyz 235.39 upaı jınap, kúmis júldeger atandy.
Osyǵan deıin habarlaǵanymyzdaı, Aıana Joldas qysqy Azıa oıyndarynyń áıelder arasynda frıstaıl-akrobatıka synynda úshinshi bolǵan edi.
Sondaı-aq, Frıstaıl-akrobatıkadan Qazaqstan ulttyq quramasynyń bapkeri Baǵlan Іńkárbek Kazinform tilshisine suhbat bergen edi.