Endi meıirger de keńes beredi: jańa júıe qalaı jumys isteıdi?

ASTANA. KAZINFORM — Qazaqstanda medıtsınalyq-sanıtarııalyq alǵashqy kómek uıymdarynda meıirgerlik qabyldaý engizildi. Bul tásil dáriger júktemesin azaıtyp, medıtsınalyq kómektiń qoljetimdiligin arttyrýǵa jáne aldyn alý sharalaryn kúsheıtýge múmkindik beredi.

Densaýlyq saqtaý mınıstrliginiń málimetinshe, jańa tájirıbe dárigerdi ákimshilik jáne qosalqy fýnktsııalardan bosatyp, patsıentterge zertteý nátıjeleri men dári-dármekti ýaqtyly alýǵa jol ashady.

Meıirger isi jónindegi shtattan tys bas maman Kúlzı Ábenova meıirgerlerdiń ókilettigin keńeıtý aýrýlardy erte anyqtap, asqynýlardyń aldyn alýǵa oń áser etetinin atap ótti.

Meıirgerlik dıagnoz neni bildiredi?

Meıirger dárigerlik dıagnoz qoımaıdy. Onyń mindeti — naýqastyń naqty shaǵymyna sáıkes meıirgerlik dıagnoz qoıý. Mysaly: «uzaq jótel», «qyshý», «aıaqtyń isinýi», «qan qysymynyń joǵarylaýy». Bul dıagnozdar densaýlyq saqtaý salasyndaǵy №149 buıryqpen rettelip, arnaıy kodtalady.

Meıirger ne isteı alady?

Jańa úlgidegi meıirgerlerdiń fýnktsıonaldyq mindetterine mynalar kiredi:

• dárigerge deıingi tekserý júrgizý (qan qysymyn ólsheý, teri men lımfa túıinderin tekserý);

• aýyz qýysy men sút bezderin qarap, onkologııalyq aýrý belgilerin anyqtaý;

• saýalnamalar arqyly júrek-qan tamyrlary, ókpe, asqazan-ishek aýrýlarynyń qaýipterin baǵalaý;

• ınfarkt pen ınsýlt qaýpi bar patsıentterdi anyqtaý (EKG, holesterın deńgeıi, lıpıdti spektr);

• qant dıabeti bar adamdardy baqylaý (qant deńgeıi, aıaq kútimi, tamaqtaný boıynsha keńes berý);

• patsıentterdi skrınıngke jáne vaktsınatsııaǵa shaqyrý;

• dınamıkalyq baqylaýdaǵy naýqastar úshin qosymsha jospar ázirleý.

Dári-dármekke retsept jazý ókilettigi

Meıirger óz betinshe dári-dármek taǵaıyndaı almaıdy. Alaıda dıspanserlik esepte turǵan patsıentterge (mysaly, gıpertonııa nemese qant dıabetimen aýyratyndar) dáriger aldyn ala taǵaıyndaǵan dárilerge elektrondyq retsept jaza alady.

Saýattylyq pen aldyn alý — basty nazarda

Meıirgerler patsıentterge durys tamaqtaný, jeke kútim, asqynýdyń aldyn alý (ásirese dıabet kezinde) sııaqty mańyzdy taqyryptarda keńes berip, ómir sapasyn arttyrýǵa kómektesedi.

Jańa júıeniń artyqshylyqtary

Keńeıtilgen praktıka meıirgeriniń jumysy kelesi tıimdilikterdi kórsetýde:

• dárigerge túsetin júktemeni azaıtady;

• patsıentterdiń ýaqytyn únemdeıdi;

• klınıkalyq zertteýlerge joldama alýdy jedeldetedi;

• dárigerlerdiń kúrdeli patsıentterge kóbirek kóńil bólýine múmkindik beredi.

Mansaptyq ósý júıesi

Mınıstrlik meıirgerler úshin kópsatyly kásibı ósý júıesin engizýde: kishi meıirger → jalpy praktıka meıirgeri → keńeıtilgen ókilettigi bar meıirger.

- Jańa formatsııadaǵy meıirger — bul dárigerdiń seriktesi. Ol óziniń quzyretin arttyra otyryp, patsıenttiń densaýlyǵyna qatysty máselelerdi sheshýde belsendi ról atqarýy tıis, — deıdi vedomstvo ókilderi.

Aıta keteıik, buǵan deıin de elimizdiń densaýlyq saqtaý júıesinde meıirgerlerdiń róli edáýir artqanyn jazǵanbyz.