Endi memorgan prokýratýranyń kelisiminsiz ınvestordy teksere almaıdy

ASTANA. Kazinform — 20 qańtardan beri birde-bir memlekettik organ prokýrordyń kelisiminsiz ınvestorǵa qatysty tekserý taǵaıyndaýǵa, ákimshilik jaýapqa tartýǵa, lıtsenzııasyn qaıtaryp alýǵa quqyǵy joq. Bul týraly QR Bas prokýratýrasy Qoǵamdyq múddelerdi qorǵaý qyzmeti bastyǵynyń orynbasary Rızat Smaǵulov málimdedi.

— Investorlarǵa qatysty memlekettik organdardyń negizgi sheshimderi boıynsha «prokýrorlyq súzgi» engizildi. Ol eń aldymen ınvestorlardy memlekettik organdardyń zańsyz sheshimderinen, negizsiz tekserýlerden, kelisimsharttardy zańsyz birjaqty buzýdan jáne basqa da tyıym salý jáne shekteý sharalarynan qorǵaýǵa arnalǵan. Bir jyldyń ishinde memlekettik organdardyń ınvestorlar úshin aýyr zardaptarǵa ákeletin barlyq sheshimderi prokýrordyń kelisiminen keıin ǵana qabyldandy. Bul mehanızm oń nátıjesin kórsetti. Prokýrorlar 700-den astam sheshimdi kelisýden bas tartty, sonyń ishinde ınvestorlarǵa qatysty 310 tekserý men 250 ákimshilik óndiristiń jolyn kesti, — dedi ol OKQ alańynda.

Spıkerdiń aıtýynsha, máseleni qaraý kezinde prokýror «zańnyń áripin» ǵana emes, aqylǵa qonymdy kózqarasty basshylyqqa alady.

— Mysaly, jer qoınaýyn paıdalanýshylardyń birine mindettemelerdiń tolyq oryndalmaýyna baılanysty kelisimshartty uzartýdan bas tartyldy. Alaıda, prokýratýra mundaı sheshimdi shyǵarýǵa ruqsat bergen joq, óıtkeni 2020 jyldan bastap jer qoınaýyn paıdalanýshy jobaǵa 10 mlrd teńgeden astam ınvestıtsııa saldy jáne jumysty toqtaýsyz júrgizip jatty. Sondyqtan oǵan óz mindettemelerin oryndaýǵa ýaqyt berýge bolady dep sheshtik, — deıdi Rızat Smaǵulov.

Onyń aıtýynsha «Prokýrorlyq súzginiń» tıimdiligin bıznes-qaýymdastyq ta, Prezıdent te joǵary baǵalap, ol Kásipkerlik, Azamattyq protsestik jáne Ákimshilik quqyq buzýshylyq týraly kodeksterde bekitilgen.

— Osy jyldyń 20 qańtarynan bastap birde-bir memlekettik organ prokýrordyń kelisiminsiz ınvestorǵa qatysty tekserýdi taǵaıyndaýǵa, ákimshilik jaýaptylyqqa tartýǵa, onyń qyzmetin toqtatýǵa, lıtsenzııany qaıtaryp alýǵa, kelisimsharttardy buzýǵa jáne talap qoıýǵa shara qoldana almaıdy. Qazir oblystyq jáne respýblıkalyq pýldyń barlyq ınvestıtsııalyq jobalary prokýrorlyq súzgiden ótedi, — dep túıdi sózin Bas prokýratýra ókili.

Aıta keteıik, elimizde ınvestorlardyń quqyǵyn buzǵan 140 laýazymdy tulǵa jazalandy. 

Sondaı-aq ınvestorlardy qoldaýdyń jańa tetikteri ázirlendi. Atap aıtqanda «Jasyl dáliz» júıesi men tsıfrlyq platforma iske qosyldy.