Endi memlekettik-jekemenshik áriptestik sharty tek konkýrstyq negizde jasalady
ASTANA. KAZINFORM – Qazaqstanda memlekettik-jekemenshik áriptestik konkýrsy tsıfrlyq formatqa kóshti. Bul týraly Ulttyq ekonomıka mınıstrligi Investıtsııalyq saıasat jáne qarjy sektoryn damytý departamenti dırektorynyń orynbasary Álisher Shaıahmetov málim etti.
- Sońǵy jyldary memlekettik-jekemenshik áriptestik jobalaryn josparlaýdyń tıimdiligi men ashyqtyǵyn arttyratyn birqatar túzetý qabyldandy. Endi memlekettik-jekemenshik áriptestik shart jasasý tek konkýrstyq negizde júrgiziledi. Sol sııaqty josparlaý jáne konkýrstyq irikteý rásimderi tsıfrlyq formatqa kóshirildi. Memlekettik satyp alýdy aınalyp ótýdi boldyrmaý maqsatynda memlekettik-jekemenshik áriptestik jobalary úshin ınvestıtsııalyq jáne paıdalaný kezeńderin iske asyrý boıynsha mindetti talaptar belgilengen, - dedi Álisher Shaıahmetov Ortalyq kommýnıkatsııalar qyzmeti alańynda ótken baspasóz máslıhatynda.
Mınıstrlik ókiliniń málimdeýinshe, búginde memlekettik-jekemenshik áriptestikti damytýdyń 2024-2028 jyldarǵa arnalǵan keshendi jospary qabyldandy.
- Memleket basshysynyń tapsyrmasy aıasynda ótken jyly memlekettik-jekemenshik áriptestik zańnamasyna táýelsiz taldaý júrgizýge Azııa damý bankiniń halyqaralyq sarapshylary tartyldy. Esep qorytyndylarymen memlekettik-jekemenshik áriptestik týraly zańnyń halyqaralyq standarttarǵa sáıkestigi rastaldy, - deıdi ol.
Eske sala ketsek, 2022 jyly elimizde memlekettik-jekemenshik áriptestiktiń búkil rásimi onlaın formatqa aýystyrylatyny aıtylǵan edi.
Byltyr elimizde memlekettik-jekemenshik áriptestik jobalaryn daıyndaý qorlary qurylatyny belgili boldy.