Endi Memlekettik Týdy balkonǵa da ilýge bolady

Jeke jáne zańdy tulǵalar patrıottyq sezimdi bildirý maqsatynda Memlekettik Týdy úılerge, ózge de ǵımarattarǵa, 45 gradýs buryshpen balkondarǵa jáne saltanatty is-sharalar ótetin oryndarǵa ile alady.

Sonymen qatar Memlekettik Tý ulttyq standartqa tolyq sáıkes bolýy tıis. Týdy zaqymdanǵan, óńi ketken, kirlegen nemese qadir-qasıetin tómendetetin ózge de aqaýlary bar kúıinde paıdalanýǵa tyıym salynady.

Jańartylǵan qaýlyda Memlekettik Týdy paıdalaný kezinde saqtalýy tıis negizgi talaptar naqtylanǵan. Atap aıtqanda:

• turǵyn úılerde Tý keminde 3 metr bıiktikte ornalastyrylýy tıis;
  eger ǵımarattyń qurylymyna baılanysty Týdy ornalastyrý múmkin bolmasa, ony ǵımaratqa irgeles aýmaqtaǵy jeke tý tuǵyryna ornatýǵa bolady;
• Memlekettik Tý jerge, edenge, sýǵa nemese ózge de zattardyń betine tımeýi tıis;
• Tý tik ilingen kezde ulttyq órnek Týdyń joǵarǵy bóliginde ornalasýy qajet;
• mádenı, sporttyq jáne qoǵamdyq is-sharalarda Memlekettik Týdy kommertsııalyq maqsatta paıdalanýǵa tyıym salynady;

Týdy jeke jáne zańdy tulǵalardyń kólik quraldarynyń salonynda ornalastyrýǵa ruqsat etiledi.

— Memlekettik Tý jarnamalyq maqsatta, sondaı-aq kıim-keshek, tósek-oryn jabdyqtary, perde, dastarqan, kilemshe jáne ózge de jabyn túrleri retinde paıdalanylmaıdy, — delingen qujatta.

Sportshylarǵa da qatysty ózgerister engizilgen. Endi Memlekettik Týdyń beınesin sportshylardyń sporttyq kıimi men jabdyqtarynda resmı túrde paıdalanýǵa ruqsat berildi.

Sonymen qatar qaýlyda memlekettik rámizderdi resmı ınternet-resýrstarda, stendter men plakattarda ornalastyrý tártibine qatysty biryńǵaı rettilik saqtalýy tıis. Aldymen Memlekettik Tý, odan keıin Memlekettik Eltańba, sodan soń Memlekettik Gımnniń mátini ornalastyrylady.

Sondaı-aq stendterdi bezendirgende fon kók tústi, al jazýlar altyn tústes bolýy kerek.

Premer-mınıstr qol qoıǵan qaýly 13 shildede kúshine enedi.

Aıta keteıik, buǵan deıin, vedomstvolyq nagradalardyń biryńǵaı standarty jaıly jazǵan edik.