Endi memlekettik nagradalar júıesine 9 jańa qurmetti ataq engizildi

ASTANA. KAZINFORM — Bul týraly Qazaqstan Respýblıkasynyń Memlekettik keńesshisi Erlan Qarın Telegram arnasynda jazdy.

Onyń sózinshe, Memleket basshysy Ulttyq quryltaıda sóılegen sózderinde eńbekqorlyq pen kásibılik qundylyqtaryn dáripteý qajettigi týraly únemi aıtyp júr. 

— Elimizde jumysshy mamandyqtarynyń mártebesi birtindep artyp keledi. Muǵalimder men dárigerlerdiń jalaqysy kezeń-kezeńimen ósip jatyr. Óndiris ozattary men eńbek dınastııalarynyń ókilderine turaqty túrde memlekettik nagradalar beriledi. Kásibı merekeler keńinen atalyp ótiletin boldy, — dep jazdy ol.

Sonymen qatar, Erlan Qarın memlekettik nagradalar júıesine (burynnan bar 6 qurmetti ataqqa) 9 jańa qurmetti ataq engizilgenin atap ótti.

— Búgin Prezıdent Qasym-Jomart Toqaev tıisti zańǵa qoıdy. Endi memlekettik nagradalar júıesine (burynnan bar 6 qurmetti ataqqa) 9 jańa qurmetti ataq engizildi. Atap aıtqanda, ǵalymdar men ónertapqyshtarǵa, ınjenerlerge, sáýletshilerge jáne qurylysshylarǵa, kenshiler men shahterlerge, geologtarǵa, ónerkásip, kólik, aýyl jáne sý sharýashylyǵy salasynyń qyzmetkerlerine beriletin qurmetti ataqtar qosyldy. Qajyrly eńbektiń memlekettik deńgeıde baǵalanýy barsha kásip ıesine erekshe shabyt beredi jáne eńbek adamynyń bedelin odan ári kóterýge septigin tıgizedi. Bul zańǵa Memleket basshysy «Jumysshy mamandyqtar jyly» dep jarııalaǵan jańa 2025 jyldyń qarsańynda qol qoıylýynyń sımvoldyq máni bar, — dep túıindedi Qarın.

Eske salsaq, Memleket basshysy Qasym-Jomart Toqaevtyń Jarlyǵymen 2025 jyl Jumysshy mamandyqtarynyń jyly dep jarııalandy. Prezıdent 27 jeltoqsanda tıisti jarlyqqa qol qoıdy.