Endi memleketten kómek alǵan bankter jańa ınvestorǵa satylyp otyrady

ASTANA. KAZINFORM – Qarjy naryǵyn retteý jáne damytý agenttiginiń tóraıymy Mádına Ábilqasymova qarjylaı qıyndyqqa tap bolǵan bankterdi bıýdjet esebinen qalpyna keltirýdiń jańa erejesin tanystyrdy.

- Zań jobasynda tólem qabileti joq bankterdiń jumysyn retteý tetigin engizý kózdelip otyr. Qoldanystaǵy tásilden basty aıyrmashylyǵy antıdaǵdarystyq rejımge kóshýdiń naqty júıesi bar bolýynda. Bul júıe banktiń qarjylyq ahýalynyń nasharlaýyna qaraı birtindep engiziledi. Retteý tetigi úsh antıkrızıstik rejımnen turady. Birinshisi – kúsheıtilgen qadaǵalaý. Ekinshisi – qarjylyq ornyqtylyqty qalpyna keltirý. Úshinshisi – tólem qabileti joq banktiń jumysyn retteý, - dedi ol.

Aıtýynsha, bankterdi memleket tarapynan qoldaýǵa tek shetin jaǵdaılarda ǵana, júıequraýshy bankter úshin ǵana, aktsıonerlik kapıtaldy tolyq paıdalanǵan jaǵdaıda jáne búkil mindettemelerdi tolyq konvertatsııalap bolǵannan keıin ǵana jol beriledi. 

- Memlekettik qoldaýdyń jalǵyz formasy bolady – memleket júıequraýshy banktiń kapıtalynan tikeleı úles alady. Bul qarjy júıesiniń turaqtylyǵyn saqtaý úshin kerek. Memlekettiń úles alýy ýaqytsha jáne qaıtarymdy negizde bolady. Qajet mólsherdiń eń tómengi bóliginde ǵana qoldaý kórsetiledi. Onyń ústine banktiń aktsıonerlerin, basshylyǵyn aýystyrý, dıvıdentter men bonýstar tóleýge tyıym salý sııaqty sharalarmen birge júredi.

Qarjylyq ornyqtylyq qalpyna kelgen soń bank jańa ınvestorǵa satylady. Al memleket salǵan aqsha bıýdjetke qaıtarylady, - dedi Mádına Ábilqasymova.

Aıta keteıik, Ulttyq bank pen Qarjy naryǵyn damytý jáne retteý agenttigi Májiliste bankter týraly zań jobasy tanystyrdy.