Endi mektepter de vaýcherlik tásilmen qarjylandyrylýy múmkin – Prezıdent

ASTANA. KAZINFORM – Prezıdent Qasym-Jomart Toqaev Úkimettiń keńeıtilgen otyrysynda mektepter salý men jańǵyrtý jumystary jóninde pikirin bildirdi.

Onyń aıtýynsha, mektepke deıingi jáne orta bilim berý salasynda ádil báseke bolýy qajet.

− Bıýdjet qarjysyn únemdep, qarajattyń ashyq jumsalýyn qamtamasyz etý mańyzdy. Buǵan jol ashatyn tásilderdi engizý jumystaryn jalǵastyrý kerek. Osy oraıda mektepke deıingi mekemelerdi vaýcherlik tásilmen qarjylandyratyn pılottyq jobany atap ótken jón. Memlekettik tapsyrys belgili bir bilim berý mekemesine baılanbaıtyn boldy. Sonyń nátıjesinde, ata-analar balabaqshany ózderi tańdaýǵa múmkindik aldy. Endi bul tájirıbeni orta bilim berý salasyna engizýge bolady. Turǵylyqty jerine qaramastan, árbir balanyń bilim alýyna qolaıly jaǵdaı jasaý – memlekettiń mindeti, − dep atap ótti Memleket basshysy.

Sonymen birge, bıyl «Jaıly mektep» ulttyq jobasy aıaqtalady.

− Barlyq aımaqta zaman talabyna saı tirek mektepter jelisi qurylyp jatyr. Meniń tapsyrmammen úsh jylda taǵy 1300 mektep jańǵyrtýdan ótedi. Budan bólek, Úkimet zamanaýı mektepter salýǵa qolaıly jaǵdaı jasap, orta bilim berý salasyna jeke ınvestıtsııa tartýy qajet, − dedi Prezıdent.

Osy ýaqytta Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.

Onda Memleket basshysy 2017 jyldan bastap 2020 jylǵa deıin birqatar iri bankke memleket tarapynan, sonyń ishinde Ulttyq qor esebinen 15 jyl merzimge qarjylaı qoldaý kórsetilgenin eske saldy.