Endi medıtsınalyq nysandardy qarjylandyrý patsıentterdiń belsendiligine baılanysty bolady
ASTANA. KAZINFORM - Medıtsınalyq-sanıtarııalyq alǵashqy kómek (MSAK) uıymdarynda belsendi emes jáne saqtandyrylmaǵan patsıentter bolǵan jaǵdaıda tómendetýshi koeffıtsıentterdi engizý nátıjesinde emhanalar bekitilgen kontıngentti ózektendirý jáne azamattardy mindetti áleýmettik medıtsınalyq saqtandyrý (MÁMS) júıesine tartý boıynsha jumysty kúsheıtti.
QR Densýlyq saqtaý mınıstrligi baspasóz qyzetiniń habarlaýynsha, jańa qarjylandyrý modeli medıtsınalyq uıymdarda uzaq ýaqyt boıy medıtsınalyq kómekke júginbeıtin patsıentterdiń, sondaı-aq saqtandyrylmaǵan adamdardyń úlesi joǵary bolyp saqtalǵan jaǵdaıda qarjylandyrý kólemin tómendetýdi kózdeıdi.
Osylaısha, qarjylandyrý tikeleı patsıentterdiń naqty belsendiligine jáne olardyń MÁMS júıesine qatysýyna táýeldi bolady.
Qabyldanǵan sharalar alǵashqy kómektiń qoljetimdiligin arttyrýǵa jáne profılaktıkalyq jumysty kúsheıtýge baǵyttalǵan. Erekshe nazar sozylmaly aýrýlardy erte anyqtaýǵa, skrınıngter júrgizýge jáne dıspanserlik baqylaýdy keńeıtýge aýdarylady.
2026 jyly Densaýlyq saqtaý mınıstrligi halyqty bekitý qaǵıdalaryn qaıta qaraýdy, qyzmet kórsetýshilerdi satyp alýǵa jiberýdiń jańa ólshemsharttaryn engizýdi, aýyldyq erekshelikterdi eskere otyryp bastapqy býyndy qarjylandyrý modelin jańartýdy jáne skrınıngterdi oblys ortalyqtary deńgeıinde ortalyqtandyrýdy josparlap otyr.
- Reformalardy iske asyrý Memleket basshysynyń densaýlyq saqtaý júıesin jańǵyrtý jáne halyqqa medıtsınalyq kómektiń qoljetimdiligin arttyrý jónindegi tapsyrmalaryn oryndaý sheńberinde júzege asyrylýda,-delingen Qazaqstan Respýblıkasy Densaýlyq saqtaý mınıstrliginiń baspasóz qyzmeti taatqan aqparatta.
Osyǵan deıin áleýmettik medıtsınalyq saqtandyrý qorynyń komıssııalyq syıaqy mólsherlemesi bekitilgeni týraly jazdyq.
