Endi medıtsına qyzmetkerlerine kúsh qoldanǵandar 12 jylǵa deıin sottalady

ASTANA. KAZINFORM — Memleket basshysy medıtsına qyzmetkerlerin quqyqtyq qorǵaýdy kúsheıtý týraly zańǵa qol qoıdy. Endi olardyń quqyǵy zańmen qorǵalady, dep habarlaıdy Densaýlyq saqtaý mınıstrliginiń baspasóz qyzmeti.

Búgin QR Prezıdenti Memleket basshysynyń fızıkalyq zorlyq-zombylyq jasaǵany jáne medıtsına qyzmetkerlerine qatygezdik kórsetkeni úshin jazany qatańdatý jónindegi tapsyrmasyn oryndaý sheńberinde ázirlengen Qylmystyq jáne qylmystyq is júrgizý kodeksterine túzetýler engizý týraly Zańǵa qol qoıdy.

Zań jobasy Qylmystyq kodekske medıtsına qyzmetkerleriniń, sondaı-aq jedel medıtsınalyq járdem brıgadalarynyń júrgizýshileriniń qyzmettik mindetterin atqarý kezinde olardyń ómirine, densaýlyǵyna jáne qaýipsizdigine qol suǵýshylyq úshin qylmystyq jaýaptylyqty belgileıtin jańa bapty engizýdi kózdeıdi.

Usynylǵan normalarǵa sáıkes:

— Eger medıtsına qyzmetkerin nemese jedel járdem júrgizýshisin zorlyq-zombylyq kórsetemin dep qorqytsa, onda ol mynadaı jazaǵa tartylýy múmkin:

• 200-den 500 aılyq eseptik kórsetkishke deıin aıyppul salynýy múmkin nemese sol mólsherde túzeý jumystaryna tartylady.
• 300 saǵatqa deıin qoǵamdyq jumystarǵa tartylady.
• Nemese 2 jylǵa deıin bas bostandyǵynan aıyrylýy múmkin.

— Aýyrlatatyn mán-jaılar bolǵan kezde qylmysker 2 jyldan 3 jylǵa deıin bas bostandyǵynan aıyrylady.

— Eger bireý ómir men densaýlyqqa qaýipti emes zorlyq-zombylyq qoldansa, oǵan mynadaı jaza taǵaıyndalady:

• 500-den 1000 aılyq eseptik kórsetkishke (AEK) deıin aıyppul;
• nemese dál sol mólsherde túzeý jumystary;
• nemese 600 saǵatqa deıin qoǵamdyq jumystar;
• nemese 2 jyldan 3 jylǵa deıingi merzimge bas bostandyǵynan aıyrý nemese shekteý.

— Eger medıtsına qyzmetkeriniń ómirine nemese densaýlyǵyna qaýipti zorlyq-zombylyq qoldansa, oǵan 5 jyldan 10 jylǵa deıin bas bostandyǵynan aıyrý jazasy beriledi.
Al eger bul áreket aýyrlatatyn jaǵdaılarda jasalsa, quqyqbuzýshy 7 jyldan 12 jylǵa deıingi merzimge qamalady.

Bul rette qylmystyq is júrgizý kodeksinde osy sanattaǵy ister boıynsha aldyn ala tergeý jáne anyqtaý júrgizý jónindegi ishki ister organdarynyń quzyretinde bolady.

Buǵan deıin Memleket basshysy Úkimetke fızıkalyq kúsh qoldaný jáne qatygezdik kórsetý arqyly medıtsına qyzmetkerlerine shabýyl jasaǵany úshin jazany qatańdatýǵa baǵyttalǵan zańnamaǵa ózgerister ázirleýdi tapsyrǵan bolatyn. Prezıdent medıtsına qyzmetkerleriniń densaýlyǵy men ál-aýqatyna nuqsan keltiretin mundaı oqıǵalardyń «Zań jáne tártip» qaǵıdattaryna sáıkes quqyqtyq salada qatań túrde jolyn kesý kerektigin atap ótti.

Aıta keteıik, Densaýlyq saqtaý mınıstrliginiń málimetinshe, 2019 jyldan bastap Qazaqstanda dárigerlerge, feldsherlerge, meıirgerlerge jáne densaýlyq saqtaý júıesiniń basqa da qyzmetkerlerine shabýyl jasaýdyń 280-nen astam faktisi jáne bıyl ǵana 58 fakt tirkeldi. 

Buǵan deıin DSM feldsherler ózin-ózi qorǵaý buıymdarymen qamtylatynyn málim etken edi. Sondaı-aq, feldsherlerdiń jalaqysyn kóterý úshin qosymsha 10 mlrd teńge qajet ekeni aıtyldy.