Tsıfrlyq eles: Qaıtys bolǵannan keıin marqumnyń jelidegi paraqshalaryna ne bolady?
ASTANA. KAZINFORM – Dúnıeden ótken adamnyń áleýmettik jelidegi paraqshalaryn da jerleýge bolatynyn bildińiz be?

Máselen Facebook qosymshasynda akkaýnttardy memorıalızatsııalaý múmkindigi bar. Memorıalızatsııalanǵan paraqshaǵa «Eske alý» mártebesi beriledi. Bul týraly jelidegi anyqtamalyq ortalyqtyń «Eske alý mártebesindegi akkaýnttar týraly» bóliminde kórsetilgen.
– Eske alý mártebesindegi akkaýnt – bul ómirden ótken adamnyń dostary men týystary ol týraly estelikterin bólise alatyn oryn. Mundaı profılde adamnyń atynyń qasynda «Eske alý» degen belgi paıda bolady. Qaıtys bolǵan adamnyń buryn jarııalaǵan jazbalary Facebook-te saqtalyp, olardy qoldanýshy bastapqyda kimge kórsetýge ruqsat etse, sol adamdar ǵana kóre alady, - delingen anyqtamalyqta.
Mundaı paraqshalar «Siz tanýyńyz múmkin» bóliminde jáne týǵan kún eskertpelerinde kórsetilmeıdi. Sondaı-aq ol adamnyń atynan eshqandaı tulǵa áleýmettik jelige kire almaıdy. Tipti marqum ózi senim bildirgen azamattar bolmasa, profıldi ózgertý de múmkin emes.
Dál osyndaı múmkindik Instagram jelisinde de qarastyrylǵan.
– Eger siz Instagram-da qaıtys bolǵan adamǵa tıesili akkaýntty kórseńiz, bul týraly bizge habarlańyz. Biz paraqshaǵa «Eske alý» mártebesin beremiz. Eger siz marqumnyń jaqyn týysy bolsańyz, profıldi óshirýge ótinish bere alasyz. Akkaýnttarǵa «Eske alý» mártebesin dáıekti suranys túsken soń ǵana ornatamyz. Biz marqumnyń dostary men týystarynyń kóńilin qulazytpaý úshin paraqshalarǵa memorıaldyq mártebe bermeýge tyrysamyz. Sonymen qatar, qaıtys bolǵan adamnyń jeke derekterin qorǵaý úshin qosymsha qaýipsizdik sharalaryn qoldanamyz. Mundaı akkaýntqa kirý úshin eshqandaı derekter berilmeıtinin eskertemiz. Basqa adamnyń paraqshasyna kirý bizdiń erejelerimizge qaıshy, - deıdi Instagram ákimshiligi.
Marqumnyń profıline memorıaldyq mártebe berý úshin onyń ómirden ozǵanyn dáleldeý kerek. Aıta keteıik, 2021 jyly Instagram qoldanýshysy jalǵan nekrologtyń kómegimen dál osy áleýmettik jeliniń negizin qalaǵan Adam Mosserıdiń akkaýntyn memorıalızatsııalap tastaǵan edi. (https://screenrant.com/instagram-memorialization-scam-founder/) Odan bólek dúnıeden ótken adamnyń akkaýntyn óshirýge de ótinish berýge bolady. Ol úshin qaıtys bolǵan qoldanýshynyń jaqyny óziniń týystyq qatynasy baryn dáleldeıtin qujatty, marqumnyń týý týraly jáne qaza tapqanyn rastaıtyn kýálikti usynýy shart.
Al ózge platformalarda ázirge mundaı múmkindik qarastyrylmaǵan.
Eske sala keteıik, buǵan deıin Facebook, TikTok pen Instagram-dy qansha qazaqstandyq qoldanatynyn jazǵan bolatynbyz.
Sonymen qatar jaqynda Túrkııa memleketi jasóspirimderdiń áleýmettik jelini paıdalanýyna shekteý engizgenin habarlaǵan edik.