Endi MÁMS-pen qamtylmaǵandar aqysyz onkologııalyq skrınıngten óte alady
ASTANA. KAZINFORM — Májilistiń jalpy otyrysynda densaýlyq saqtaý salasyna qatysty zań qabyldady.
Bul qujat 2024 jylǵy 25 jeltoqsanda Parlament Májilisiniń jalpy otyrysynda birinshi oqylymda maquldanǵan edi. Búgin zań ekinshi oqylymda talqylandy. Zań jobasy artyq zańnamalyq reglamentteýdi bolǵyzbaýǵa jáne densaýlyq saqtaý júıesin jetildirýge baǵyttalǵan quqyqtyq normalardy kózdeıdi.
Májilistiń Áleýmettik-mádenı damý komıtetiniń málimetine qaraǵanda, depýtattar qujatty talqylaý barysynda onyń normalaryn edáýir pysyqtady. Bul rette estý qabileti buzylǵan adamdarǵa áleýmettik qoldaý kórsetý qadamdary qarastyrylǵan.
Sonymen qatar, halyqtyń nysanaly toptaryn skrınıngtik zertteýlermen tolyq qamtýdy qamtamasyz etý eskerilgen. Zańda tegin medıtsınalyq kómektiń kepildik berilgen kólemi aıasynda kórsetiletin qyzmetter tizbesine onkologııalyq aýrýlardy erte anyqtaýǵa skrınıngtik zertteýlerdi engizý usynyldy.
— Densaýlyq saqtaý mınıstrliginiń qaramaǵyndaǵy ǵylymı-zertteý ınstıtýttaryna rezıdentýra daıarlaý baǵdarlamalary boıynsha, al beıindi baǵyttar boıynsha doktorantýra daıarlaý baǵdarlamalary boıynsha medıtsınalyq joǵary oqý oryndarymen birlesip derbes oqytý quqyǵyn berýge baǵyttalǵan túzetýler engizildi, — dedi depýtat Dáýlet Muqaev.
Onyń aıtýynsha, qujatty talqylaý aıasynda depýtattar bas bostandyǵyn shekteý túrindegi jazaǵa sottalǵan nemese shartty túrde sottalǵan adamdardyń qumar oıyndarǵa qatysýyna tyıym salýǵa, sondaı-aq býkmekerlik keńseler men totalızatorlardy jarnamalaý bóliginde zańnamany qatańdatýǵa baǵyttalǵan túzetýler engizdi.
Sonymen qatar bul zańǵa qatysty depýtat Ashat Aımaǵambetov túsinik berdi.
— Búgin óte mańyzdy túzetýler qabyldandy. 3,5 mln adamǵa jaqsy jańalyq dep aıta alamyn. Nege? Medıtsınalyq saqtandyrýmen qamtylmaǵan 3,5 adam bar. Olarda onkologııa boıynsha skrınıngten ótý quqy joq, ıaǵnı bul adamdardy eshkim qabyldamaı otyr. Al skrınıngten ótpegennen keıin, onkologııalyq aýrýdy erte kezeńde anyqtaý qıynǵa túsedi… Endi MÁMS aıasynda qamtylmaǵan 3,5 adam aqysyz túrde onkologııa boıynsha skrınıngten ótýge múmkindik alyp otyr, — dedi A. Aımaǵambetov.
Atap aıtqanda, osy qujat aıasynda qaralatyn máselelerdiń keńeıýin eskere otyryp, onyń taqyryby «Qazaqstan Respýblıkasynyń keıbir zańnamalyq aktilerine densaýlyq saqtaý, oıyn bıznesi jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» dep ózgertildi.
Budan buryn habarlanǵandaı, Ǵylym jáne joǵary bilim mınıstrligi Kazinform saýalyna joldaǵan jaýapta akademık Dos Sarbasov bastaǵan qazaqstandyq ǵalymdardyń onkologııa qarsy dárisin óndiristik deńgeıge shyǵarý úshin qansha aqsha ketýi múmkin ekenin aıtty.