Endi qumar oıynǵa áýes memlekettik qyzmetkerlerdi avtomatty túrde anyqtaıdy

ASTANA. KAZINFORM — Qazaqstanda bás tigetin, oıynqumar memlekettik qyzmetkerlerdi arnaıy júıe arqyly anyqtaıdy. Bul týraly Týrızm jáne sport vıtse-mınıstri Erjan Erkinbaev málim etti. 

— Arnaıy júıe qurastyrylady, óıtkeni qolmen terip anyqtaý múmkin emes, sebebi táýlik ishinde 50 myńǵa jýyq ótinim túsedi. Onyń ishinde memlekettik qyzmetker me, boryshker me nemese áskerı qyzmetker me bir saǵattyń nemese bir kúnniń ishinde anyqtaý múmkin emes. Sondyqtan bizdiń mınıstrlik avtomattandyrylǵan júıe ázirlep jatyr, — dedi Erjan Erkinbaev Senatta ótken baspasóz máslıhatynda.

Vıtse-mınıstrdiń málimdeýinshe, atalǵan júıe 3-4 aıdyń ishinde iske qosylady jáne onyń kómegimen bás tikken nemese oıynqumar adamnyń kim ekenin jedel anyqtaýǵa bolady.

— Al ázirge ár oıyn sýbektileri qolmen tekserip jatyr, — deıdi ol.

Sondaı-aq, mınıstrdiń orynbasary bás tigetini anyqtalǵan memlekettik qyzmetkerdiń jumystan qýylatynyn tilge tıek etti.

Aıta keteıik, búgin Senattyń Áleýmettik-mádenı damý jáne ǵylym komıtetiniń depýtattary oıyn bıznesi jáne elimizde lotereıaǵa qatysty qabyldanǵan zańnamaǵa engizilgen ózgeristerdi iske asyrý barysyn talqylady.

Eske sala ketsek, qazaqstandyqtar ózin 10 jylǵa deıin qumar oıyndardan shekteı alady.