Endi qosymsha arqyly jalǵan taýardy tez ajyratýǵa bolady
ASTANA. KAZINFORM – eGov Mobile mobıldi qosymshasynda taýarlardy tsıfrlyq kodtar boıynsha tekserý fýnktsııasy qoljetimdi boldy.
Jańa fýnktsıonal Naqty Onim servısi negizinde iske asyrylyp, paıdalanýshylarǵa tsıfrlyq tańbalaý júıesinen málimetterge tez jáne tegin qol jetkizýdi qamtamasyz etedi.
Qazirgi ýaqytta paıdalanýshylar jalǵan ónim jıi kezdesetin sanattardaǵy taýarlardy, sonyń ishinde dári-dármekterdi, temeki buıymdaryn jáne aıaq kıimdi teksere alady. eGov Mobile qosymshasyndaǵy tsıfrlyq kodty (Data Matrix-kody) skanerleý arqyly taýardyń túpnusqalyǵy, óndirýshisi, negizgi sıpattamalary jáne ónimniń shyǵarylǵan kúni týraly aqparat kórsetiledi.
Qyzmetti paıdalaný úshin:
- eGov Mobile qosymshasynda avtorızatsııadan ótip, «Servıster» bólimin ashý kerek;
- «Naqty Onim» servısin tańdap, derekterdi berýge kelisim berý qajet;
- «Bastaý» batyrmasyn basyp, smartfon kamerasyn Data Matrix kodyna baǵyttaý kerek.
Skanerleýden keıin paıdalanýshyǵa tekserý nátıjesi kórsetiledi. Eger tsıfrlyq kod bolmasa nemese durys bolmasa, júıe tıisti habarlamany shyǵarady.
eGov Mobile qosymshasyndaǵy tekserý fýnktsııasy mindetti tsıfrlyq tańbalaýǵa jatatyn jáne Data Matrix kody bar taýarlarǵa qoldanylady. Dári-dármekterdi tekserý kezinde ónimniń naqty dárilik preparat sanatyna jatatyny eskeriledi. Sondaı-aq onyń óndirilgen kúni mańyzdy: 2024 jylǵy 1 shildege deıin shyǵarylǵan dáriler mindetti tsıfrlyq tańbalaýǵa jatpaıdy jáne skanerleý kezinde júıede kórinbeýi múmkin. Mundaı jaǵdaıda tekserý nátıjesiniń shyqpaýy taýardyń zańsyz nemese jalǵan ekenin bildirmeıdi.
— Qazirgi tańda Qazaqstanda 2024 jylǵy 1 shildeden bastap shyǵarylǵan dári-dármekter, sondaı-aq barlyq temeki ónimi men aıaq kıim mindetti túrde tsıfrlyq tańbalanady. 2026 jylǵy 1 aqpannan bastap syra men motor maılaryn tańbalaý kezeń-kezeńimen engiziledi, al 2026 jylǵy 1 jeltoqsannan bastap jeńil ónerkásip taýarlaryna da qoldanylady, — delingen habarlamada.
Sonymen qatar qazir pılottyq rejımde bıologııalyq belsendi qospalar, medıtsınalyq maqsattaǵy buıymdar, turmystyq hımııa, gaz ballondar jáne ósimdik maıyn tańbalaý synaqtan ótip jatyr. Aldaǵy ýaqytta bul sanattaǵy taýarlardy da zańdylyǵy men túpnusqalyǵyn tekserýge múmkindik paıda bolady.
Aıta ketelik elde motor maılaryn tańbalaý júıesi iske qosyldy.