Endi keıbir salyq tóleýshiler EShF júıesine bıometrııa arqyly kiredi
ASTANA. KAZINFORM — Memlekettik kirister komıteti táýekeli bar salyq tóleýshiler úshin bıometrııalyq sáıkestendirýdi engizdi.
Vedomstvo málim etkendeı, tsıfrlyq tehnologııalar kúndelikti ómirdiń ajyramas bóligine aınaldy. Búginde bıometrııalyq sáıkestendirý memlekettik qyzmetterdi alý kezinde jáne bank salasynda keńinen qoldanylyp, derbes derekterdiń senimdi qorǵalýyn qamtamasyz etedi ári alaıaqtyq táýekelderin tómendetedi.
QR Qarjy mınıstrliginiń Memlekettik kirister komıteti salyqtyq ákimshilendirýdiń ashyqtyǵyn, qaýipsizdigin jáne tıimdiligin arttyrýǵa baǵyttalǵan zamanaýı tsıfrlyq sheshimderdi kezeń-kezeńimen engizip keledi.
2024 jylǵy aqpannan bastap «Elektrondyq shot-faktýralar» (EShF) aqparattyq júıesinde táýekel sanatyna jatqyzylǵan salyq tóleýshiler úshin bıometrııalyq sáıkestendirý pılottyq rejımde qoldanyldy. Pılottyq joba 2025 jyldyń sońynda aıaqtalyp, atalǵan tetiktiń tıimdiligin rastady.
— Osyǵan baılanysty 2026 jylǵy 1 qańtardan bastap jańa Salyq kodeksinde salyqtyq ákimshilendirý sheńberinde bıometrııalyq sáıkestendirýdi qoldaný múmkindigi kózdelgen. Bıometrııalyq sáıkestendirýdi paıdalaný qyzmetine olardyń basshylary is júzinde baqylaý jasamaıtyn kompanııalardyń jalǵan elektrondyq shot-faktýralardy rásimdeý táýekelderin tómendetýge múmkindik beredi. Sonymen qatar bul kóleńkeli aınalymdy qysqartýǵa, salyqtyq protsesterdiń ashyqtyǵyn arttyrýǵa jáne adal bıznesti josyqsyz kontragenttermen ózara is-qımyl jasaýdan qorǵaýǵa yqpal etedi, — deıdi mamandar.
Sáıkestendirý rásimi barynsha qarapaıym ári yńǵaıly. Kompanııalardyń basshylary ony kompıýter arqyly «EShF» aqparattyq júıesinde nemese mobıldi qosymsha arqyly óte alady. Sáıkestendirý paıdalanýshynyń ornalasqan jerine qaramastan, onyń ishinde Qazaqstan Respýblıkasynan tys jerde de qoljetimdi.
Bıometrııalyq sáıkestendirý táýekel belgileri bar salyq tóleýshilerge ǵana qoldanylatynyn aıta ketý qajet, . Adal salyq tóleýshilerdiń basym bóligi úshin «EShF» aqparattyq júıesimen jumys isteý tártibi ózgerissiz qalady.
Buǵan deıin QR Ulttyq ekonomıka birinshi vıtse-mınıstri Azamat Ámrın mınıstrlik Salyq kodeksine jańa túzetýler daıyndalyp jatqanyn málimdedi.
