Qazaqstanmen shekaralas elderde mundaı prank jasamaımyn – Qytaı men Ózbekstanda daýly vıdeo túsirgen bloger

TAShKENT. KAZINFORM – Taıaýda Qytaı men Ózbekstannyń qoǵamdyq oryndarynda beıtanys jigitterdiń aıaq-qolynan ustap, prank túsirgen bloger qyzdyń áreketi halyq arasynda qyzý talqylandy. Tıisinshe, Arýjan Aıbekovaǵa qatysty ákimshilik jaza qabyldandy. Osy oraıda Kazinform tilshisi daýly vıdeo avtorymen suhbat quryp, blogerden mundaı qadamǵa ne úshin barǵanyn surap kórdi. 

– Arýjan Aıbekqyzy, áýeli ózińiz týraly aıta ketseńiz. Qaı jerdiń týmasysyz, blogerlikke qashan bet burdyńyz?

– Men Taldyqorǵan qalasynyń týmasymyn, 19 jastamyn. Qazirgi tańda Qamalladin ýnıversıtetinde «Marketıng» mamandyǵy boıynsha bilim alyp jatyrmyn. Bala kezimnen medıa salasyna qyzyqtym. Sondyqtan tańdaǵan mamandyǵyma qaramastan, osydan bir jyl buryn blogerlikke bet burdym. Bastapqyda túrli baǵytta vıdeolar túsirip júrdim. Keıin metro formatynda prank jasap kórdik. TMD aýmaǵynda osyndaı vıdeolar túsiretin qyzdar óte az. Búgingi tańda 1,2 mln oqyrmanym bar, onyń ishinde sheteldikterdiń úlesi basym. Negizgi maqsat – halyqqa kóńil-kúı syılaý.

– Áleýmettik jelidegi paraqshańyzdy sholyp shyqtym. Blog formaty erekshe eken. Nelikten mundaı baǵytta prank túsirýg bel býdyńyz?

– Buǵan deıin túrli baǵytta kontent jasap, ózimniń stılimdi izdedim. Degenmen olardyń ishinen eń qyzyǵy osy metro formaty boldy. Tıisinshe, ol oqyrmandarǵa unady, qoldaý tapty. Men vıdeolardy ashyq ári shynaıy túsiremin. Adamdarmen aldyn-ala kelispeımin. 

– Qytaı men Ózbekstanda túsirgen prankter kópshilik talqysyna tústi. Buǵan qatysty ózińizdiń pikirińiz qandaı?

– Rezonans týdyrǵan vıdeony Qytaıǵa bıznes jasaýǵa barǵanda túsirgen edim. Alaıda, ol eldiń mentalıteti basqa. Men ony memleketti qaralaý maqsatynda túsirgen joqpyn. Desek te osy vıdeo kópshiliktiń talqylqysyna tústi. Onda bizdiń adamdar: «Ol qyz sottaldy, onyń ústinen is qozǵaldy» dep shýlasty. Negizi Qytaı tarapymen eshqandaı másele bolǵan joq, tek eskertýmen shekteldi.

Endi Tashkentte túsirilgen vıdeoǵa toqtalsam, ol tek meniń emes, búkil komandanyń sheshimi boldy. «Bul qyz ótken jaǵdaıdan sabaq almaı ma?!» degen pikirler jazyldy. Tıisinshe, ony ózimniń tobyma eskertip, vıdeony óshirip tastaýdy usyndym. Alaıda, ol komandanyń ıdeıasy bolǵannan keıin qarsy kele almadym.

Qytaı tarapyna eshqandaı renishim joq. Osyndaı rezonans bolǵan soń Qazaqstanǵa oralýǵa týra keldi. Eger mundaı jaǵdaı bolmaǵanda men Qytaıda kásipkerlikpen aınalysyp júre berer edim.

Sonymen qatar biz ózbekstandyq blogerlermen birlese kontent jasadyq. Atap aıtqanda, turǵyndarǵa gúl, tamaq usynyp, ortalyqta shoý uıymdastyrdyq. Al, metroda túsirgen vıdeoda men jigitterdiń sanynan emes, qolynan ustaǵanmyn. Ol prank 13 mıllıonǵa jýyq qaralym jınady. Atalǵan vıdeo úshin kinálimin dep oılamaımyn. Degenmen qazir mundaı prank túsirgim kelmeıdi. Óıtkeni, Ózbekstan tarapynan bolǵan teris pikirler maǵan aýyr tıdi. Jeke basyma til tıgizgender jıiledi.

– Túsirgen prankter qazaq qyzynyń ádebine jáne jalpy Qytaı, Ózbekstan halyqtarynyń mentalıtetine qaıshy degen oı bolǵan joq pa?

– Iá, ondaı oı boldy. Men barlyq memlekettiń zańy men mádenıetin qurmetteımin. Osy oraıda, Qytaıdaǵy jaǵdaı úshin ol elden keshirim suraımyn. Óıtkeni, ol jaqtaǵy zańnyń qatal ekenin jáne bul vıdeonyń rezonans týdyratynyn bilmedim. 

Máselen, Qazaqstanda jastar erkin júredi. Al Ózbekstannyń jastary ustamdy, sypaıy keledi. Sondyqtan olarǵa kóńil-kúı syılaǵym keldi. TMD deńgeıinde alyp qarasaq, mundaı vıdeolar qalypty dúnıe. Meniń kontentimnen Qazaqstannyń abroıyna nuqsan keledi dep oılamaımyn.

Aldaǵy ýaqytta vıdeolarymdy abaılap túsiremin. Prank jasaýdy jalǵastyramyn. Osy jaǵdaılardan keıin tartynshaqtap, qorqasoqtap qaldym. Bul ata-anama, týysqandaryma jetip, olar maǵan renishin bildirdi.

– Sizge qatysty ákimshilik is qozǵaldy. Ózińizge salynǵan aıyppuldy qanshalyqty oryndy dep esepteısiz?

– Men áýel basta túsinbedim. Ol vıdeo Ózbekstanda túsirilse, nelikten oǵan Qazaqstan aıyppul salady?! Sotta túsindirgendeı, men QR azamaty bolǵannan keıin shara elde qabyldanady. «Halyqtyń ashý-yzasyn keltirdi, rezonans týdyrdy» degennen keıin aıyppuldy tóleımin dep sheshtim. Ózime de sabaq boldy, tıisinshe qabyldanǵan sharamen kelistim. Ákimshilik kodekstiń «Usaq buzaqylyq» baby boıynsha 20 AEK kóleminde, ıaǵnı 78 myń teńge shamasynda aıyppul salyndy. Sotta vıdeolarda harassmenttiń belgileri bar ekeni aıtyldy. Qaıdaǵy zorlyq-zombylyq?! Men prankti ázil retinde túsiremin. Máselen, avtobýsta harassmenttiń qurbany bolyp jatqan kóp qyz bar. Men endi aldaǵy ýaqytta qoǵamdyq kólikterdegi osyndaı jaǵdaılardy túsirip, kópshilikke kórsetkim keledi. 

Degenmen sot sheshimimen kelisemin. Sýdıa maǵan qazaq qyzdarynyń tárbıesi men ádebine qatysty aqyl-keńesin berdi.

– Arýjan, osy jaǵdaılardan keıin mundaı baǵyttaǵy prankterdi túsirýdi jalǵastyrasyz ba, álde osy oqıǵadan keıin ózgeshe oı túıdińiz be? 

– Osy oqılardan keıin biraz oılandym. Óıtkeni, meniń tarapyma aıtylǵan túrli synı pikir jasytyp jiberdi. Jeke basyma qatysty bylapyt sózder jazyldy. Endi solardyń ústinen tıisti organdarǵa aryz túsirgim keledi. Degenmen barlyǵy jalǵan paraqshalar. Adamdarǵa qandaı vıdeo túsirip, usynsań da jaqpaıdy. Men Qazaqstanmen shekaralas elderde mundaı prank túsirmeımin, al odan tys memleketterdiń aýmaǵyna barsam, oılanyp kóremin.

– Ýaqyt bólip, suhbat bergenińizge rahmet!

Eske sala keteıik, buǵan deıin Almatyda Qytaı men Ózbekstanda daýly vıdeo túsirgen blogerge qatysty is qozǵalǵanyn habarlaǵanbyz.