Endi qazaqstandyqtardyń ál-aýqat deńgeıi jańa júıemen ólshenedi
ASTANA. KAZINFORM — Áleýmettik járdemaqy taǵaıyndaý kezinde otbasynyń ál-aýqat deńgeıi 23 áleýmettik-demografııalyq jáne ekonomıkalyq kórsetkishter boıynsha anyqtalady. Búginde pılottyq joba iske qosyldy.
Jańa tártipti Eńbek jáne halyqty áleýmettik qorǵaý mınıstrligine qarasty áleýmettik kómek departamentiniń bas sarapshysy Altynaı Seısembaeva túsindirip berdi.
— Shymkent qalasy men Qaraǵandy oblysynda 6 memlekettik organ arqyly kórsetiletin 11 memlekettik qyzmet biryńǵaı tsıfrlyq platforma arqyly usynatyn pılottyq jobany júzege asyryla bastady. Bul jergilikti atqarýshy organdar tarapynan kórsetiletin qosymsha qoldaý sharalaryna qatysty. Onyń ishinde mekteptegi tegin tamaqtaný, stýdentterge arnalǵan jataqhana, balalar lagerine joldama, turǵyn úı kómegi jáne basqa da qoldaý sharalary kiredi. Olardy taǵaıyndaý kezinde otbasynyń ál-aýqat deńgeıi 23 áleýmettik-demografııalyq jáne ekonomıkalyq kórsetkishter boıynsha anyqtaıtyn úlgi qoldanylady, — deıdi Altynaı Seısembaeva.
Mınıstrlik sarapshysynyń málimdeýinshe, atalǵan úlgi negizinde otbasynyń tabysy, múlki, nesıesi, sondaı-aq densaýlyq jaǵdaıy tekseriledi.
— Odan bólek, kóleńkeli tabysy, mysaly, beıresmı jumys isteý sııaqty materıaldyq emes faktorlar eskeriledi. Pılottyq joba aıasynda otbasylardyń ál-aýqat deńgeıi boıynsha 6 sanatqa jikteledi. Sheshim otbasynyń tsıfrlyq kartasy arqyly jınaqtalǵan obektıvti derekter negizinde avtomatty túrde qabyldanady. Eger otbasynda 2 nemese odan da kóp turǵyn úı, 2 nemese odan da kóp avtokólik bolsa jáne otbasynyń ár múshesine shaqqanda ortasha aılyq tabys 4 eń tómen kúnkóris deńgeıinen asyp ketse, ol otbasy 6 sanatty ál-aýqatty otbasylar qataryna jatqyzylady. Atalǵan otbasylar jergilikti atqarýshy organdardyń bıýdjet esebinen kórsetiletin qosymsha áleýmettik qoldaý alýshylar tiziminen shyǵarylýy múmkin. Pılottyq jobany engizý bala týǵanda jáne bala 1,5 jasqa tolǵanǵa deıin onyń kútimine baılanysty járdemaqyǵa, kópbalaly jáne marapattalǵan analarǵa, múgedektigi bar balany tárbıelep otyrǵan jandarǵa beriletin járdemaqyǵa qatysy joq. Sonymen qatar asyraýshysynan aıyrylǵan jaǵdaıda taǵaıyndalatyn járdemaqyǵa áser etpeıdi. Respýblıkalyq bıýdjetten tólenetin zeınetaqy, barlyq járdemaqy, ataýly áleýmettik kómek, sondaı-aq memlekettik-áleýmettik saqtandyrý qorynan tólenetin 5 túrli tólem burynǵy tártippen kórsetiledi, — dep túsindirdi maman.
Aıta keteıik, elimizde jyl basynan beri 4,7 mln adamǵa áleýmettik tólem berildi.
Eske salaıyq, ótken jyly bıýdjetten áleýmettik tólemderge 5,3 trln teńge bólindi.