Endi qazaqstandyqtar jumys izdemeıdi — Mınıstr jańa proaktıvti qyzmet týraly
ASTANA. KAZINFORM — Qazaqstanda jumyspen qamtý salasy jańa formatqa kóship jatyr. Endi azamattar bos jumys oryndaryn ózderi izdemeı, júıe olardyń biliktiligi men eńbek naryǵyndaǵy suranysqa sáıkes jumys usynady. Bul týraly Eńbek jáne halyqty áleýmettik qorǵaý mınıstri Asqarbek Ertaev aıtyp berdi.
Onyń aıtýynsha, jumyspen qamtý salasyn proaktıvti modelge kóshirý úshin vedomstvo Tsıfrlyq jumyspen qamtý qyzmetin engizip jatyr.
— Jańa modeldiń negizgi qaǵıdaty — jumysty adam izdemeıdi, jumys adamdy ózi tabady. Buǵan deıin jumys izdeýshiler bos oryndardy ózi qarap, mansap ortalyqtaryna ózi júginetin. Endi júıe jumys berýshilerdiń qajettilikterin taldap, jumysqa muqtaj azamattardy anyqtaıdy. Osydan keıin azamattarǵa eGov Mobile, Enbek.kz mobıldi qosymshalary nemese 1414 nómirinen SMS-habarlama arqyly aqparat joldanady, — dedi Asqarbek Ertaev Úkimet otyrysynda.
Mınıstrdiń sózinshe, jasandy ıntellekt óńir ishinde de, óńiraralyq deńgeıde de usynystar ázirleıdi. Ásirese jumysshy mamandyqtar boıynsha suranysqa ıe bos oryndardy ár adamǵa jeke iriktep beredi.
Sonymen birge, júıe azamattarǵa qaıta daıarlaý, biliktilikti arttyrý kýrstarynan ótý jáne basqa óńirge qonys aýdarý múmkindikteri týraly usynystar jasaıdy.
— Azamat turaqty jumysqa ornalasqansha tolyq qoldaý kórsetiledi. Joba shilde aıynda Pavlodar oblysynda pılottyq rejımde iske qosyldy. Osy ýaqyt ishinde óńir turǵyndaryna jumysqa ornalasý múmkindigi týraly 39 myń SMS-habarlama jiberilgen. Nátıjesinde 962 adam turaqty jumysqa ornalasty, — dedi Eńbek mınıstri.
Qyrkúıek aıynda tsıfrlyq jumyspen qamtý qyzmetin Mańǵystaý oblysynda engizý josparlanyp otyr. Al jyl sońyna deıin servıs elimizdiń barlyq 20 óńirinde qoljetimdi bolady.
Aldaǵy ýaqytta júıe Aitu mobıldi qosymshasy arqyly da jumys isteıdi. Ondaǵy JI-kómekshi paıdalanýshynyń tájirıbesi men daǵdylaryna sáıkes bos jumys oryndaryn, sondaı-aq oqytý kýrstaryn usynyp otyrady.
Buǵan deıin Asqarbek Ertaev áleýmettik tólemderdi taǵaıyndaýǵa JI kómektesetinin málimdegen edi.
