Endi qazaqstandyqtar Reseıge jańa ereje boıynsha saparlaıdy
ASTANA. KAZINFORM — Bıyl 30 maýsymnan bastap Reseıge barýdy josparlaǵan Qazaqstan azamattary shekaradan ótem degenshe 72 saǵattyń ishinde kirý týraly habarlap, tsıfrlyq profıldi toltyrýy tıis.
Bul shara zańsyz kóshi-qonmen kúreske baǵyttalǵan pılottyq joba aıasynda engizilip jatyr. Profıldi RuID qosymshasy arqyly toltyrýǵa bolady, ol jerde sondaı-aq medıtsınalyq saqtandyrýdy rásimdeý múmkindigi qarastyrylǵan.
Atalǵan ózgeristerdiń 6 jasqa deıingi balalarǵa, sondaı-aq Reseıde akkredıtatsııalanǵan dıplomatııalyq ókildikter men halyqaralyq uıymdardyń qyzmetkerlerine jáne olardyń otbasylaryna qatysy joq.
Mysaly, eger týysynyń qaıtys bolýyna nemese densaýlyǵyna baılanysty shuǵyl túrde jolǵa shyǵý qajet bolsa, onda shekaradan kirýge keminde 4 saǵat qalǵanda RuID qosymshasy arqyly habarlap, jeke kabınetke tıisti qujattar men anyqtamalardy júkteý qajet.
— Vızasyz rejımdegi elderdiń azamattaryna kirýdiń jańa erejeleri engizildi. Bul bizdiń elimizdiń azamattaryna da qatysty. Atap aıtqanda, 30 maýsymnan bastap Qazaqstan azamattary Reseı Federatsııasyna kirýine 72 saǵat qalǵanda ProID — bul jańa platforma júıesine kirip, jeke kabınetinde derekterdi toltyryp, fotosy men jeke málimetterin júkteýi kerek. Sondaı-aq, elge barý josparyna sáıkes kirý jáne bolý merzimin kórsetýi qajet, — dedi Qazaqstan Respýblıkasynyń Reseıdegi elshiliginiń keńesshi-konsýly Ǵazız Aǵybaev Jibek Joly telearnasynyń efırinde.
Sonymen qatar jańa erejege sáıkes Reseıge adyraspan alyp kirýge tyıym salynady. Ol quramynda esirtki jáne psıhotroptyq zattar bar ósimdikter tizimine engizilgen. Zań buzylǵan jaǵdaıda 3 jyldan 5 jylǵa deıin bas bostandyǵynan aıyrý nemese 1 mıllıon rýblge (5 mıllıon teńgege) deıin aıyppul qarastyrylǵan.
Aıta ketsek, ótken jyldan beri qazaqstandyqtardyń adyraspandy kórshi elge alyp ótpek bolǵany úshin sottalǵan jaǵdaılar jıilegen.
Aıta keteıik, 17 mamyrda Qazaqstan Prezıdenti Qasym-Jomart Toqaev pen Reseı prezıdenti Vladımır Pýtınmen telefon arqyly sóılesip, ekijaqty yntymaqtastyqtyń ózekti máselelerin talqylady.