Endi Qaraǵandyda áldebireý oqýshylarǵa oq jaýdyramyn dep qorqytyp jatyr
QARAǴANDY. KAZINFORM - Qaraǵandyda belgisiz bireý mektepterde lańkestik áreket daıyndalyp jatqanyn habarlady. Barlyq oqý oryndarynda kúzet kúsheıtildi.
Tańerteńnen áleýmettik jelilerde Qaraǵandyda lańkestik áreket jasaımyn dep qaýip tóndirgen belgisiz adamnyń habary tarap ketti.
Ata-analar bul jaıtqa alańdaýshylyq bildirip jatyr.
Habarlama taratýshy kem degende 700 oqýshy zardap shegedi dep qorqytty. Polıtsııa osy jaǵdaıǵa túsinik berdi.
«Qazirgi ýaqytta quzyretti organdarmen birlesip osy aqparatty taratqan adamdardy anyqtaý boıynsha jedel is-sharalar júrip jatyr. Oqý oryndarynda qaýipsizdikti qamtamasyz etýge, onyń ishinde beınebaqylaý jáne mekteptardiń mańynda polıtsııa narıadtaryn ulǵaıtýǵa erekshe nazar aýdaryldy», — dep habarlady Qaraǵandy oblysynyń PD.
Osyndaı jalǵan habarlama jyl basynan beri kórshi memleket pen Qazaqstannyń birqatar qalasynda tarady.
Jýyrda Aqtóbe men Pavlodarda áldebireýler mektepke baryp, oqýshylarǵa oq jaýdyramyz dep qorqytty.
Polıtseılerdiń aıtýynsha, bul habarlamalar halyq arasynda dúrbeleń týǵyzýǵa baǵyttalǵan.
Tártip saqshylary azamattardan úreıge boı aldyrmaı, sabyr saqtaýdy suraıdy.
Polıtsııa departamenti atalmysh jaǵdaı quqyq qorǵaý organdarynyń baqylaýynda dep sendirdi.
