Endi qamqorshylyq taǵaıyndaý qyzmetine ótinimdi eGov.kz arqyly bere alasyz

ASTANA. KAZINFORM — Qamqorshylyq taǵaıyndaý qyzmeti eGov.kz portalynda jáne eGov Mobile mobıldi qosymshasynda qoljetimdi boldy. Bul týraly «Ulttyq aqparattyq tehnologııalar» AQ málim etti. 

Endi eGov.kz portalynda jáne eGov Mobile mobıldi qosymshasynda áreketke qabiletsiz nemese áreket qabileti shekteýli kámeletke tolǵan azamattarǵa qamqorshylyq pen qorǵanshylyq belgileý qyzmeti qoljetimdi. Jańa qyzmet ótinish berý protsesin aıtarlyqtaı jeńildetip, qaǵaz túrindegi qujat aınalymyn joıady jáne jalǵan málimetterdi usyný qaýpin azaıtady. Qyzmet jeke jáne zańdy tulǵalar úshin tegin kórsetiledi.

— Kámeletke tolǵan azamattyń áreketke qabiletsiz nemese áreket qabileti shekteýli dep tanylýy sot sheshimimen júzege asyrylady. Osy sheshim negizinde bolashaq qorǵanshy nemese qamqorshy eGov.kz portaly nemese eGov Mobile qosymshasy arqyly qamqorshylyq belgileý týraly ótinish bere alady, — delingen habarlamada.

Qyzmetti eGov.kz portalynda paıdalaný úshin:

• kz portalynda avtorızatsııadan ótip, «Azamattarǵa» — «Otbasy» — «Qamqorshylyq, qorǵanshylyq, qoldaý» bólimine ótý qajet;
• «Áreketke qabiletsiz nemese áreket qabileti shekteýli kámeletke tolǵan azamattarǵa qorǵanshylyq nemese qamqorshylyq belgileý» qyzmetin tańdap, «Onlaın suraý» batyrmasyn basý kerek;
• ótinish beriletin adamnyń JSN-in engizý qajet;
• ótinish berýshiniń baılanys nómiri men elektrondyq poshtasyn kórsetip, «Kelesi» batyrmasyn basý kerek;
• ótinish berýshimen birge turatyn qamqorlyqqa alynatyn adamnyń mekenjaıyn tańdaý qajet;
• kórsetilgen mekenjaı boıynsha tirkelgen nemese birge turatyn tulǵalardy qosý kerek;
• ótinishke qoljetimdi tásilderdiń birimen qol qoıý qajet;
• qyzmet nátıjesi paıdalanýshynyń Jeke kabınetinde «Kórsetilgen qyzmetter tarıhy» bóliminde qoljetimdi bolady.

Qyzmetti eGov Mobile mobıldi qosymshasynda paıdalaný úshin:

• eGov Mobile qosymshasynda avtorızatsııadan ótip, «Qyzmetter» — «Jeńildikter, járdemaqy, zeınetaqy» bólimine ótý qajet;
• «Áreketke qabiletsiz nemese áreket qabileti shekteýli kámeletke tolǵan adamdarǵa qorǵanshylyq nemese qamqorshylyq belgileý» qyzmetin tańdap, qajetti óristerdi toltyrý kerek;
• turǵylyqty mekenjaıdy engizip, birge turatyn tulǵalardy kórsetý qajet (mindetti emes);
• ótinishti Face ID/Touch ID arqyly qol qoıý qajet.

Ótinish bergennen keıin, paıdalanýshynyń Jeke kabınetine tıisti buıryq nemese dáleldi bas tartý jóneltiledi. Qyzmet kórsetý merzimi — 19 jumys kúni.

Sonymen qatar, ótinishti qyzmet alýshynyń turǵylyqty jeri boıynsha Halyqqa qyzmet kórsetý ortalyǵynda qajetti qujattardy tapsyrý arqyly da berýge bolady.

Jańa qyzmet QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń Memlekettik kórsetiletin qyzmetter komıteti, «Ulttyq aqparattyq tehnologııalar» AQ jáne QR Eńbek jáne halyqty áleýmettik qorǵaý mınıstrliginiń birlesken jumysy aıasynda iske asyryldy.

Buǵan deıin habarlanǵandaı, aýdıtorlar endi memlekettik aýdıtor sertıfıkatyn eGov.kz arqyly ala alady.