Salyq júıesine elektrondy saýda deklaratsııasy engiziledi

ASTANA. KAZINFORM — Májilis Eýrazııalyq ekonomıkalyq odaqtyń Keden kodeksi týraly shartqa elektrondyq saýdany retteý baǵytynda ózgerister engizetin hattamasyn ratıfıkatsııalaý týraly zańdy qabyldady.

Qujatty Premer-mınıstrdiń orynbasary — Ulttyq ekonomıka mınıstri Serik Jumanǵarın tanystyrdy.

2023 jyldyń 25 jeltoqsanynda Reseıdiń Sankt-Peterbýrg qalasynda ótken Joǵary Eýrazııalyq ekonomıkalyq keńes otyrysynda Eýrazııalyq ekonomıkalyq odaqtyń Keden kodeksi týraly shartqa elektrondy saýda boıynsha ózgerister engizý týraly hattama bekitilgen bolatyn. Májilis osy hattamany ratıfıkatsııalaý týraly sheshim qabyldap, Senatqa joldady.

Bul qujat halyqaralyq poshta arqyly úshinshi elderdiń (EAEO-ǵa múshe emes elderden — red.) ınternet-platformalarynan jeke tulǵalardyń atyna jiberiletin taýarlardy «elektrondyq saýda taýarlary» retinde bólek sanatqa bólýdi kózdeıdi.

— «Elektrondyq saýda operatory» uǵymyn engizý usynylyp otyr. Sondaı-aq, elektrondyq saýda deklaratsııasy degen jańa túrdegi keden deklaratsııasy engiziledi. Qazirgi tańda sheteldik ınternet-platformalardan satyp alynatyn taýarlardyń quny 200 eýrodan, salmaǵy 31 kılogramnan aspasa, jeke paıdalanýǵa arnalǵan taýarlar sanatyna jatady. Osyǵan baılanysty, atalǵan taýarlar resmı statıstıkaǵa engizilmeıdi. Sebebi saýda aınalymyna jatpaıdy. Elektrondyq saýda taýarlarynyń barlyq kólemin deklaratsııalaý sheteldik ınternet-platformalardan satyp alynatyn taýarlar týraly tolyq statıstıkany qurýǵa múmkindik beredi, — dedi vıtse-premer.

Sondaı-aq, ol bul qujat sheteldik ınternet saýda platformalaryna ǵana mindetteme júkteıtinin, al Qazaqstannyń qarapaıym tutynýshylary shekaradan burynǵydaı tártippen kirip-shyǵatynyn túsindirdi.

Eske salsaq, Astana halyqaralyq forýmynda Eýrazııalyq ekonomıkalyq komıssııanyń ekonomıka jáne qarjy saıasaty mınıstri Baqytjan Saǵyntaev EAEO-ǵa múshe elderdiń kedendik baj úlesin qaıta qaraý máselesi nege kesheýildep jatqanyn aıtqan edi.