Endi ǵımarattardy paıdalanýǵa berý úshin órt qaýipsizdigi qorytyndysy qajet
ASTANA. KAZINFORM — Qazaqstanda obektilerdi paıdalanýǵa berer aldynda órt qaýipsizdigi qorytyndysyn alý mindetteledi, dep habarlaıdy Órtke qarsy qyzmet komıtetiniń baspasóz qyzmeti.
2026 jylǵy 1 aqpannan bastap Qazaqstanda obektini qabyldaý jáne paıdalanýǵa bermes buryn onyń órt qaýipsizdigi talaptaryna sáıkestigi týraly qorytyndyny alýdy mindetteýdi kózdeıtin azamattyq qorǵaý salasyndaǵy jańa talap kúshine enedi.
— Bul mindet qurylysqa tapsyrys berýshige júkteledi jáne adamdar kóp jınalatyn nysandarǵa, sondaı-aq bıiktigi 28 metrden asatyn ǵımarattarǵa, onyń ishinde kóppáterli turǵyn úılerge de qoldanylady. Qorytyndy ýákiletti organnyń aýmaqtyq bólimsheleri daıyn nysanda júrgizilgen órt-tehnıkalyq tekserýdiń nátıjesi boıynsha beriledi, — delingen komıtet habarlamasynda.
Qorytyndyny berý tártibi men onyń nysany «Obektiniń órt qaýipsizdigi talaptaryna sáıkestigi týraly qorytyndy berý qaǵıdalaryn bekitý týraly» Tótenshe jaǵdaılar mınıstrliginiń 2025 jylǵy 26 tamyzdaǵy № 359 jáne «Obektiniń órt qaýipsizdigi talaptaryna sáıkestigi týraly qorytyndynyń nysanyn bekitý týraly» 2025 jylǵy 6 tamyzdaǵy № 309 buıryqtarymen bekitilgen. Atalǵan normatıvtik quqyqtyq aktiler ashyq qol jetkizýde ornalastyrylǵan.
Qorytyndy berý memlekettik kórsetiletin qyzmet formatynda elektrondyq túrde «elektrondyq úkimet» veb-portaly arqyly «E-lıtsenzııalaý» memlekettik derekter bazasynyń aqparattyq júıesinde júzege asyrylatyn bolady.
Budan buryn Astanada tamaqtaný oryndarynda órt qaýipsizdigi qalaı qamtamasyz etilip jatqanyn jazǵanbyz.