Endi emhanalarda meıirgerler de naýqas qabyldaı alady

ASTANA. KAZINFORM – Elimizde alǵashqy medıtsınalyq kómektiń jańa modeli engizildi.

Jańa ózgeriske saı, endi keıbir jeńil jaǵdaılarda naýqastardy meıirgerler qabyldaıdy. Bul týraly búgin «Alǵashqy medıtsınalyq-sanıtarlyq kómek júıesin jańǵyrtý» taqyrybynda ótken baspasóz otyrysynda densaýlyq saqtaý mınıstrliginiń mamany habarlady.

- Endi dáriger keıbir mindetterin medbıkege tapsyrýy múmkin. Sonyń arqasynda medbıkeler buryn tek dáriger atqaratyn keıbir medıtsınalyq qyzmetterdi ózderi oryndaı alady. Bul dárigerge kúrdeli klınıkalyq jaǵdaılarǵa kóbirek nazar aýdarýǵa múmkindik berip, medıtsınalyq kómektiń qoljetimdiligin arttyrady deıdi, - «Respýblıkalyq medıtsınalyq-sanıtarııalyq alǵashqy kómek ortalyǵy» ShJQ RMK dırektory Aıgúl Qasymova.

Qabyldaý kezinde meıirgerler:

• Patsıentpen saýalnama júrgizedi;
• Áleýmettik jáne psıhologııalyq táýekelderdi anyqtaıdy (ómir súrý jaǵdaıy, tamaqtaný, osaldyq faktorlary);
• Obektıvti tekseris jasaıdy (qan qysymy, salmaq, teri jaǵdaıy jáne t.b.);
• STOP dıagnostıka júrgizedi (mysaly, dıabetpen aýyratyndarda – taktıldik jáne aýyrsyný sezimtaldyǵy tekseriledi);
• Sestrındik dıagnoz qoıady;
• Qoldanystaǵy klassıfıkator boıynsha óz quzyretindegi em-sharalardy júrgizedi;
• Buryn dáriger taǵaıyndaǵan tegin dári-dármek retseptin jazyp beredi, keıbir anyqtamalardy beredi jáne baqylaý jospary boıynsha usynystar jasaı alady.