Endi elordada jol erejesin Sergek drondar baqylaıdy
ASTANA. KAZINFORM — Astanada Sergek drondary synaqtan ótip jatyr. Bul týraly Sergek Group kompanııasynyń baspasóz qyzmeti habarlady.
Aqparatta aıtylǵandaı, Sergek júıesimen ıntegratsııalanǵan drondardy qoldaný naqty ýaqyt rejıminde jol erejesin buzǵandardy, alıment tólemegender men boryshkerlerdi anyqtaýǵa, aqparatty polıtsııa planshetine jyldam jetkizýge jáne sol arqyly quqyq qorǵaý organdarynyń jumys tıimdiligin arttyrýǵa jol ashady.
— Bizdiń maqsat — joldaǵy qaýipsizdik. Intellektýaldy beınebaqylaý júıesimen jabdyqtalǵan drondar naqty ýaqytta zań buzýshylyqty tirkep, erejeni buzǵan kólikti tabýǵa jáne málimetti jedel patrýl qyzmetine jetkizýge múmkindik beredi. Bul tek jedel áreket etý ǵana emes, jol apaty sanyn azaıtyp, joldaǵy tártipti kúsheıtýge yqpal etetin sheshim, — dedi Іshki ister mınıstrligi aqparattandyrý jáne baılanys departamentiniń bastyǵy, polıtsııa polkovnıgi Sergeı Vargo.
Synaq aıasynda Sergek Group ázirleýshileri Іshki ister mınıstrligi jáne «Qaztelekom» AQ ókilderimen birlese otyryp, drondardy ártúrli baǵytta synaıdy. Atap aıtqanda, patrýldeý formatynan bastap naqty baǵyttalǵan izdestirýge deıin. Eger nátıjeler oń bolsa, atalǵan joba basqa óńirlerge de keńeıtilýi múmkin.
— Búginde drondar eldiń tsıfrlyq ınfraqurylymynyń ajyramas bóligi. Olar azamattar men qoǵamnyń qaýipsizdigin qamtamasyz etýge yqpal etip jatyr. Drondar tabıǵı qubylystardy baqylaýda jáne qoǵamdyq tártipti qadaǵalaýda burynnan qoldanylady. Osy oraıda «Qaztelekom» kompanııasy drondardy beınebaqylaý júıesine, onyń ishinde qalalyq orta monıtorıngi men orman alqaptaryndaǵy órttiń aldyn alý baǵytyndaǵy jobalarǵa engizý jumysyn júrgizip jatyr. Bul tehnologııany qoldaný aýqymy aldaǵy ýaqytta tek keńeıe bermek, — deıdi «Qazaqtelekom» AQ Basqarma tóraǵasy Baǵdat Mýsın.
Sondaı-aq, resmı habarlamada Sergek júıesimen jabdyqtalǵan drondardy qoldaný tsıfrlyq qaýipsizdiktiń jańa deńgeıi ekeni aıtylǵan. Bul tehnologııa polıtsııanyń áreket etý jyldamdyǵyn arttyryp qana qoımaı, qabyldanatyn sheshimniń naqtylyǵyn da kúsheıtedi.
— Biz árdaıym jańa tehnologııalyq synaqqa ashyqpyz. Sergek júıesimen jabdyqtalǵan drondardy qoldaný bolashaqqa qadam ǵana emes, Qazaqstannyń IT salasy álemdik deńgeıdegi sheshimdi ázirlep, iske asyra alatynynyń aıqyn dáleli, — dedi Sergek Group kompanııasynyń bas dırektory Evgenıı Kım.
Bıyl kóktemde Sergek ITS mamandary Qazaqstannyń eki iri qalasy — Astana men Almatydaǵy kólik qozǵalysyn saralap, eń jıi tirkelgen kólik markalary men modelderi týraly aqparat taratqan edi
Eske salaıyq, jyl basynan Almatyda Sergek kameralary avtoturaq erejelerin buzǵan kólikterdi anyqtap jatyr.