Endi elimizge keletin shetel azamattaryna QR kod beriledi
ASTANA. KAZINFORM – Qazaqstanǵa keletin shetel azamattarynyń qaýipsizdigin qamtý maqsatynda jańa platforma iske qosyldy. Bul týraly Іshki ister mınıstrligi habarlaıdy.
- Memleket basshysy jaqynda ótken Úkimettiń keńeıtilgen otyrysynda týrızmdi damytýdyń jáne sheteldik qonaqtarǵa qolaıly jaǵdaı jasaýlyń strategııalyq mańyzyn atady. Іshki ister mınıstrligi elge keletin týrısterdiń qaýipsizdigin qamtamasyz etýdi jalǵastyryp keledi. Endi árbir sheteldik qonaqqa elge kirgen boıda, sondaı-aq shekara baqylaýynan ótken kezde elektrondy kóp tildi QR kody bar arnaıy karta beriledi, - dep túsindiredi vedomstvodan.
Vedomstvonyń málimetinshe, sheteldik qonaq QR kodtyń kómegimen portalǵa ótedi, ol jerde qaýipsiz júrip-turýǵa qatysty barlyq aqparat, usynym men paıdaly mobıldi qosymshalar qoljetimdi.
- QR kody bar alǵashqy kartalar elordanyń áýejaıynda sheteldik qonaqtarǵa tabystala bastady, - deıdi mınıstrlikten.
Safetravel.kz portalynda shetelden keletin azamattarǵa usynylady:
- polıtsııamen jedel baılanys ornatýǵa arnalǵan «102» mobıldi qosymshasy, onyń ishinde «SOS» fýnktsııasy da bar
- kóshi-qon zańnamasyn saqtaý jónindegi jadynama
- tanymal qosymshalarǵa silteme jasalǵan qala kartasy
- resmı taksı men onlaın qyzmetterdiń tizimi
- baılanys operatorlarynyń tizimi jáne olardyń resmı saıttaryna silteme
- ár túrli jaǵdaıda áreket etý algorıtmderi
- basqa shuǵyl qyzmet baılanystary, onyń ishinde jedel járdem, órt sóndirý bólimi, biryńǵaı qutqarý qyzmeti.
Eske sala ketsek, Qazaqstan byltyr 435 408 adamǵa uıaly baılanys operatoryna tirkelip, bank kartasy men shotyn ashýǵa múmkindik beretin jeke sáıkestendirý nómirin bergen.