Endi elektrondyq jeke medıtsınalyq kitapsha barlyq adamǵa qoljetimdi
ASTANA. KAZINFORM – Endi barlyq azamat úshin qoljetimdi taǵy bir mańyzdy servıs – elektrondyq jeke medıtsınalyq kitapsha. Búginde bul servıs eGov Mobile jáne Halyk mobıldik qosymshalarynda qoljetimdi.
Densaýlyq saqtaý mınıstrligi málimetinshe, endi dekrettelgen kásipterde jumys isteıtin qyzmetkerlerge qaǵaz túrindegi medıtsınalyq kitapshany alyp júrýdiń qajeti joq. Telefondaǵy elektrondyq medıtsınalyq kitapshany ashý jetkilikti.
Sonymen qatar sanıtarııalyq-epıdemıologııalyq qyzmet mindetti medıtsınalyq tekserýlerden ótýdi qashyqtan baqylaýǵa múmkindik aldy. Eger jeke medıtsınalyq kitapshada medıtsınalyq tekserýden ótý merzimi ótip ketkeni anyqtalsa, qyzmetkerdi jumystan ýaqytsha shettetý boıynsha jedel sharalar qabyldanady.
Qazaqstanda alǵash ret myna baǵyttardy biriktirgen sanıtarııalyq-epıdemıologııalyq qyzmettiń biryńǵaı tsıfrlyq ekojúıesi quryldy:
- memlekettik sanıtarııalyq-epıdemıologııalyq baqylaý;
- dekrettelgen kásipter qyzmetkerleriniń medıtsınalyq tekserýleri;
- zerthanalyq zertteýler;
- kásiporyndardyń óndiristik baqylaýy;
- halyqty vaktsınatsııalaý monıtorıngi.
Aıta keteıik, Densaýlyq saqtaý mınıstrligi kórsetiletin medıtsınalyq qyzmetterdiń jarnamasyn júzege asyrý qaǵıdalaryna ózgertý engizbek.
