Endi eGov Mobile arqyly gaz kórsetkishterin onlaın joldaýǵa bolady
ASTANA. KAZINFORM — eGov Mobile-da gaz eseptegish kórsetkishterin jiberetin jańa servıs iske qosyldy, dep habarlaıdy QR Elektrondyq úkimetiniń baspasóz qyzmeti.
eGov Mobile mobıldi qosymshasynda gaz eseptegish kórsetkishterin onlaın túrde joldaýǵa múmkindik beretin jańa QazaqGaz Aimaq servısi iske qosyldy. Servıs kontrolerdi kútip, qaǵaz qujat toltyrý qajettiligin joıady. Qosymsha onlaın túrde jiberilgen kórsetkishterdiń durystyǵyn jasandy ıntellekt tekseredi.
Atalǵan qyzmet túri ýaqytty únemdeýge jáne naqty kórsetkishterge súıene otyryp gaz tólemin dálirek esepteýge múmkindik beredi.
— Servıstiń negizgi ereksheligi — kórsetkishterdi jasandy ıntellekt arqyly avtomatty tekserý. Júıe eseptegishtiń fotosyn engizilgen derektermen salystyryp, sáıkessizdikterdi jibermeı turyp anyqtaıdy. Bul qolmen engizý kezindegi dálsizdikterdi boldyrmaıdy, paıdalanýshyny qate esepteýlerden qorǵaıdy jáne kontroler tarapynan qosymsha tekserý qajettiligin azaıtady, — delingen habarlamada.
Servısti paıdalaný úshin:
- eGov Mobile qosymshasyna kirý;
- «Servıster» bólimine ótip, «QazaqGaz Aimaq» servısin tańdaý;
- derekterdi usynýǵa kelisim berip, kórsetilgen málimetterdi tekserý;
- jeke shot nómirin engizý, júıe oǵan tirkelgen eseptegishter tizimin kórsetedi;
- qajetti eseptegish boıynsha ózekti kórsetkishterdi engizý;
- ár eseptegishtiń fotosyn júkteý, jasandy ıntellekt derekterdi salystyrady;
- «Kórsetkishterdi jiberý» batyrmasyn basý.
Servıske qosymshanyń basty betindegi arnaıy banner arqyly da ótýge bolady.
Kórsetkishter aı saıyn 25-inen kelesi aıdyń 5-ine deıin qabyldanady. Onlaın joldaý qolmen engizý kezindegi qatelikterdi azaıtady, gaz tutynýdy dálirek esepke alýǵa múmkindik beredi jáne derekterdiń memlekettik tsıfrlyq platforma arqyly qaýipsiz berilýin qamtamasyz etedi.
Buǵan deıin Aitu men eGov-qa tegin qoljetimdilik zańmen bekitiletinin jazǵanbyz.
