Endi eGov GPT arqyly memlekettik qyzmet alýǵa bolady
ASTANA. KAZINFORM – Qazaqstanda eGov GPT arqyly 50 memlekettik qyzmetti qarapaıym chat formatynda alýǵa bolady. Bul týraly QR Jasandy ıntellekt jáne tsıfrlyq damý mınıstrliginiń birinshi vıtse-mınıstri Rostıslav Konıashkın málimdedi.
— Jaqynda ǵana eGov GPT-ti iske qostyq. Qazirdiń ózinde ol arqyly 50 memlekettik qyzmetti qarapaıym chat arqyly alýǵa bolady, ıaǵnı ChatGPT nemese basqa da agentterdi paıdalansańyz, dál sol sııaqty júıemen sóılesip, memlekettik qyzmetterdi ala alasyz, — dedi Rostıslav Konıashkın.
Onyń aıtýynsha, jasandy ıntellekt baılanys ortalyqtaryna da belsendi engizilip jatyr. Bul azamattardyń ótinishterin óńdeý qunyn jáne qyzmetkerlerge túsetin júktemeni azaıtýǵa múmkindik beredi.
Sonymen qatar mınıstrlik azamattar arasynda eń kóp suranysqa ıe memlekettik qyzmetterdi tsıfrlandyrý jumystaryn jalǵastyryp jatyr. Konıashkınniń aıtýynsha, 2026 jyldyń birinshi jartyjyldyǵynda halyqqa qyzmet kórsetý ortalyqtaryna júgingen azamattardyń sany byltyrǵy osy kezeńmen salystyrǵanda 30% azaıǵan.
— Biz azamattarymyzdyń barlyq ótinishiniń 79-80 paıyzyn quraıtyn eń suranysqa ıe 10 memlekettik qyzmet boıynsha belsendi jumys istedik, — dedi birinshi vıtse-mınıstr.
Jasandy ıntellekt azamattarǵa kórsetiletin servısterge ǵana emes, memlekettik organdardyń ishki jumysyna da engizilip jatyr. Sonymen birge Konıashkınniń aıtýynsha, memlekettik qyzmetshiler Qazaqstannan tys jerde ornalasqan serverlerde derekterdi óńdeıtin modelderdi paıdalana almaıdy. Sondaı-aq memlekettik derektermen qaýipsiz jumys isteý úshin sýperkompıýter iske qosyldy.
— Endi qyzmettik hat-habarlar men qujattardy qaýipsiz óńdeı alamyz. Qazirdiń ózinde jasandy ıntellekt hattardyń qysqasha mazmunyn jasaýǵa, azamattardyń kóptegen ótinishterin taldaýǵa, sondaı-aq baıandamalar men prezentatsııalar ázirleýge jáne aýdarma jasaýǵa kómektesip jatyr, — dedi spıker.
Birinshi vıtse-mınıstrdiń aıtýynsha, jasandy ıntellekt ekonomıkanyń túrli salalaryna da engizilip jatyr.
— Medıtsına salasyn alsaq, qazirdiń ózinde medıtsınalyq keskinderdi avtomatty túrde taldaý tehnologııasy qoldanylyp jatyr. Ol belgili bir aýrýlardy áldeqaıda jyldam anyqtaýǵa kómektesedi. Sondaı-aq qurylys qujattamalaryn taldaý júıeleri engizilip jatyr. Bul adam faktoryn azaıtyp qana qoımaı, protsesterdi jedeldetýge múmkindik beredi, — dedi ol.
Sonymen qatar ár mınıstrlikte tıisti salanyń tsıfrlyq transformatsııasyna jaýapty tulǵalar taǵaıyndalǵan. Mınıstrliktiń taǵy bir basym baǵyty azamattardy jasandy ıntellektpen jumys isteý daǵdylaryna jappaı oqytý.
— Jasandy ıntellekt quraldarymen ózara árekettesýdiń negizgi daǵdylaryn meńgerý balalarǵa, ıaǵnı kelesi urpaqqa berilýge tıis mindet dep biz shynymen senemiz jáne buǵan tolyq kóz jetkizdik, — dedi Konıashkın.
Onyń pikirinshe, jasandy ıntellekt tehnologııalary adamdy tolyǵymen almastyratyn jaǵdaıǵa alyp kelmeıdi. Kerisinshe, jańa quraldardy tıimdi paıdalanýdy úırengen mamandardyń artyqshylyǵy bolady.
— Eńbek naryǵy ózgeredi, biraq bul jasandy ıntellekt biz úshin bárin isteıdi degen baǵytta emes, kerisinshe, jasandy ıntellektpen jumys isteýdi úırengen jáne ony tıimdi paıdalanatyn adamdardyń ónimdiligi artady degen baǵytta ózgeredi, — dep atap ótti ol.
Ol qazirgi jasandy ıntellektti engizý kezeńin qazaqstandyqtardyń búginde kúndelikti qoldanyp júrgen tsıfrlyq qujattarǵa kóshý úderisimen salystyrdy.
— Biz bul qyzmetti alǵash iske qosqan kezde de adamdar kúmándandy, qalaı paıdalaný kerektigin oılady. Sol sebepti bul qyzmetterdi banktik jáne mobıldi qosymshalarǵa da shyǵardyq. Óıtkeni azamattarymyzdyń bank qosymshalaryn kún saıyn paıdalanatynyn túsindik, — dedi Konıashkın.
Onyń aıtýynsha, memleket budan ári de azamattarǵa tsıfrlyq servısterge qol jetkizýdiń barynsha yńǵaıly joldaryn izdeıdi.
— Biz azamattarymyzǵa qalaı ońaı jolmen jetýge bolatynyn, jańa múmkindikterdi olarǵa úırenshikti ekojúıeler men mehanızmder arqyly qalaı kórsetýge bolatynyn izdep jatyrmyz, — dep qorytyndylady birinshi vıtse-mınıstr.
Aıta keteıik, JI Qazaqstanda munaı uńǵymalaryn burǵylaıtyn eń tıimdi núkteni anyqtaıdy.
