Endi eGov arqyly áleýmettik tólemderden óz erkimen bas tartýǵa bolady
ASTANA. KAZINFORM — Eńbek jáne halyqty áleýmettik qorǵaý mınıstrligi 2026 jylǵy qazan aıynan bastap «Áleýmettik tólemder men járdemaqylardan erikti túrde bas tartý» tsıfrlyq servısin iske qosty.
Servıs tek áleýmettik tólemder men járdemaqylardy alyp júrgen azamattarǵa qoljetimdi. Al mundaı tólemderdi almaıtyn azamattar servısti paıdalana almaıdy.
— Áleýmettik tólemder men járdemaqylardan erikti túrde bas tartý — azamattyń mindeti emes, tek óz erkimen qabyldaıtyn sheshimi. Servıs eshqandaı talap qoımaıdy jáne azamattarǵa qatysty shekteýler engizbeıdi. Bul múmkindik azamattarǵa ózderiniń turmystyq jaǵdaıy men jeke jaýapkershiligin eskere otyryp, sanaly tańdaý jasaýǵa jol ashady. Servıs, eń aldymen, memlekettik qoldaýǵa muqtaj emes, óz qajettilikterin óz betinshe qamtamasyz etýge múmkindigi bar tabysy joǵary jáne ál-aýqaty joǵary azamattarǵa arnalǵan, — dep túsindirdi vedomstvo.
Barlyq rásim tsıfrlyq formatta júzege asyrylady. Sondyqtan memlekettik organdarǵa baryp, qaǵaz júzinde ótinish toltyrýdyń qajeti joq.
— Servıske kirgen kezde eGov Mobile qosymshasy qajetti málimetterdi avtomatty túrde tekserip, azamatqa taǵaıyndalǵan jáne tólenip jatqan barlyq járdemaqylar men áleýmettik tólemderdiń tizimin usynady. Qandaı da bir aqparatty qolmen engizýdiń qajeti joq. Eger azamat qandaı da bir tólemnen bas tartý týraly sheshim qabyldasa, usynylǵan tizimnen tıisti tólemdi tańdap, áreketin rastaýy jáne elektrondyq ótinishti jiberýi jetkilikti. Al eger azamat bıýdjet qarajaty esebinen tólenetin áleýmettik tólemder men járdemaqylardy almasa, júıe bul týraly habarlama kórsetip, servısti paıdalanýǵa múmkindik bermeıdi, — dep atap ótti mamandar.
Eńbek mınıstrliginiń málimetinshe, áleýmettik tólemnen nemese járdemaqydan erikti túrde bas tartý azamattyń bolashaqta memlekettik qoldaý alý úshin qaıta ótinish berý quqyǵyn shektemeıdi. Ómirlik jaǵdaıy ózgergen jaǵdaıda azamat tıisti tólemdi qaıta taǵaıyndaý jóninde ótinish bere alady. Ótinish qoldanystaǵy zańnamada belgilengen tártippen jáne tólem taǵaıyndaý talaptaryna sáıkes qaralady.
Servısti ázirleýshiler ony azamattar úshin barynsha yńǵaıly etýge basymdyq beredi. Osy maqsatta qosymshanyń ózinde keri baılanys qaldyrý múmkindigi qarastyrylǵan. Paıdalanýshylar óz pikirlerin bildirip, suraqtaryn joldap, usynystaryn jibere alady. Sondaı-aq servıs jumysyna qatysty eskertýlerin de qaldyrýǵa bolady.
— Azamattardy saq bolýǵa jáne tek Eńbek mınıstrliginiń resmı aqparat kózderine senýge shaqyramyz. Atalǵan servıs tek eGov Mobile resmı mobıldi qosymshasynda nemese eGov.kz portalynda jumys isteıdi. Eńbek mınıstrligi messendjerler arqyly áleýmettik tólemderden bas tartýǵa arnalǵan kúmándi siltemeler jibermeıdi. Alaıaqtardyń arbaýyna túsip qalmaý úshin bógde siltemelerge ótpeńizder. Kez kelgen qyzmettiń qoljetimdiligin tek eGov júıesindegi jeke kabınet arqyly tekserińizder, — dep eskertti jaýapty mekeme.
Osyǵan deıin eGov Mobile qosymshasyndaǵy ál-aýqatty baǵalaý kalkýlıatory qalaı jumys isteıtinin jazǵanbyz.
