Endi EAEO aýmaǵyna kólikpen jetkiziletin taýarlar týraly aldyn ala aqparat beriletin bolady
ASTANA. KAZINFORM - «Keden» kedendik aqparat júıesin kezeń-kezeńimen engizý jónindegi jumystardy jalǵastyrý sheńberinde QR Qarjy mınıstrliginiń Memlekettik kirister komıteti Eýrazııalyq ekonomıkalyq odaqtyń keden aýmaǵyna avtomobıl kóligimen jetkizilýi tıis taýarlar jóninde aldyn ala habar beretin qyzmetti engizbek.

2025 jylǵy 17 aqpannan bastap avtomobıl ótkizý pýnktterinde aldyn ala aqparatty usyný jáne óńdeý «Keden» aqparattyq júıesinde júzege asyrylatyn bolady.
Aldyn ala aqparatty keden organdary kedendik operatsııalardy jasaýdy jedeldetý jáne kedendik baqylaýdy júrgizýdi ońtaılandyrý úshin paıdalanady.
Óz kezeginde aldyn ala aqparat berý Eýrazııalyq ekonomıkalyq odaq aýmaǵyna taýarlar men kólik quraldary kelgen kezde kedendik operatsııalardy jáne aralas qyzmetterdi ıntegratsııalanǵan baqylaýdy ótý merzimin qysqartýǵa múmkindik beredi.
Taýarlardy avtomobıl kóligimen ótkizý kezinde júıede aldyn ala aqparatty toltyrý jáne tirkeý tártibi boıynsha nusqa https://keden.kgd.gov.kz portaldaǵy basty bette ornalastyrylǵan.
Tehnıkalyq suraqtar týyndaǵan jaǵdaıda paıdalanýshylardy qoldaý qyzmetine habarlasýǵa bolady:
+7 7172 73 55 19, +7 705 956 53 89
e-mail: keden_support@kgd.minfin.gov.kz.
telegram arnasy: https://t.me/kedenkgdgovkz.
Osyǵan deıin qazaq-ózbek shekarasynda keden termınaly ashylatyny týraly habarlandy.