Endi daıyn qujatty HQO-dan táýlik boıy alýǵa bolady

ASTANA. KAZINFORM – Daıyn qujattardy HQO-dan ózińizge yńǵaıly ýaqytta alý úshin postamat qyzmetin paıdalanýǵa bolady, dep habarlaıdy Azamattarǵa arnalǵan úkimet.

Bul servıs táýlik boıy jumys isteıdi jáne demalys pen mereke kúnderi de qoljetimdi.

- Postamattar jańartylǵan HQKO ǵımarattarynda, táýlik boıy ashyq aımaqtarda ornalasqan. Qujat daıyn bolǵan kezde azamat ony mamanǵa júginbeı-aq, postamattaǵy jeke uıashyqtan ózi alyp kete alady.

Qyzmetti rásimdeý kezinde HQKO-da ótinish bergende daıyn qujatty alý tásili retinde postamatty tańdaý qajet. Qujat postamatqa ornalastyrylǵannan keıin azamattyń telefon nómirine SMS-habarlama jiberiledi. Habarlamada uıashyqty ashýǵa arnalǵan jeke kod kórsetiledi. Sonymen qatar bıometrııalyq sáıkestendirýden ótý qarastyrylǵan, - dep jazylǵan aqparatta.

Daıyn qujatty úsh kún ishinde alyp ketýge bolady. Eger osy merzimde alynbasa, qujat HQKO mamany arqyly ádettegi tártippen beriledi.

Qazirgi tańda postamattar elimizdiń 10 óńirinde ornatylǵan. Jalpy sany 14 qurylǵy jumys isteıdi. Olar arqyly memlekettik qyzmetterdiń 19 túri boıynsha daıyn nátıjelerdi alýǵa bolady. 2026 jyly bul qyzmettiń quny 518 teńgeni quraıdy.

2025 jyldyń qorytyndysy boıynsha postamat qyzmetin eń kóp paıdalanǵan qalalar – Semeı, Taraz jáne Túrkistan.

Aıta keteıik, Jetisýda júk kólikterin zańsyz tirkep otyrǵan mamandandyrylǵan HQO qyzmetkerleri sottaldy.