Endi daryndy oqýshylar «Bolashaq» baǵdarlamasy aıasynda bilim ala alady

ASTANA. KAZINFORM – Jumys tobynyń otyrysynda halyqaralyq olımpıadalar men ǵylymı jobalar jeńimpazdaryn qoldaý týraly norma qabyldandy. Endi halyqaralyq olımpıadalar men ǵylymı jobalar baıqaýlarynyń jeńimpazdary «Bolashaq» baǵdarlamasy aıasyndaǵy tıisti talaptarǵa sáıkes kelse, bakalavrıat deńgeıinde bilim ala alady. Bul týraly depýtat Ashat Aımaǵambetov áleýmettik jelidegi paraqshasyna jazdy. 

«Bul óte mańyzdy túzetý:  buǵan deıin «Bolashaq» tek magıstratýra jáne doktorantýra deńgeıindegi oqýdy qarjylandyratyn. Bul óz aldyna durys sheshim bolǵanymen, halyqaralyq olımpıadalar jeńimpazdaryna qatysty másele týyndaıtyn edi. Álemdik jetekshi ýnıversıtetter bul talantty balalarǵa birden bakalavrıatqa granttar usynatyn, sol sebepti olar shetelge ketip qalatyn. Sol kezeńde biz olarǵa dál osyndaı qoldaý kórsete almadyq, sondyqtan olardy jıi joǵaltyp otyrdyq. Kópshiligi shetelde oqýmen qatar, sol jaqta turaqtap qalyp jatty», - dep jazdy Ashat Aımaǵambetov.

Depýtattyń pikirinshe, osyndaı balalarǵa memlekettik bıýdjet esebinen grant berý – mańyzdy qadam.

«Sáıkesinshe, endi «Bolashaq» baǵdarlamasy eń daryndy oqýshylar úshin bakalavrıattan bastap qoljetimdi bolady. Bul – jas talanttardy qoldap, olardy elde ustaýǵa múmkindik beretin mańyzdy jańashyldyq. Olar álemniń úzdik joǵary oqý oryndarynda bilim alyp, keıin elge oralyp, Qazaqstannyń damýyna óz úlesterin qosady. Daryndy balalardy qoldaý – olardyń bolashaǵyna salynǵan ınvestıtsııa ǵana emes, bul Qazaqstannyń damýyna baǵyttalǵan strategııalyq qadam», - deıdi ol.

Eske sala keteıik, buǵan deıin Ádil Qusmanov Halyqaralyq baǵdarlamalar ortalyǵynyń basqarma tóraǵasy bolyp taǵaıyndalǵanyn jazǵan bolatynbyz.