Endi bir dıplommen, bir mamandyqpen ómir boıy jumys isteý múmkin emes – depýtat
ASTANA. KAZINFORM – Májilis depýtaty Juldyz Súleımenova Eńbek naryǵyndaǵy jańashyldyqtarǵa beıimdelý úshin qandaı zańnamalyq ózgerister bolǵanyn aıtyp berdi.
– 2023-2024 jyly biz eńbek naryǵynyń zańnamalyq tetikterin qalyptastyrdyq. Búginde eńbek naryǵy qalaı damysa, eldiń ekonomıkasy soǵan qaraı damyp otyrady. Úlken másele – eńbek naryǵynyń sapasy bolyp otyr. Sondyqtan byltyr biz kásiptik biliktilik týraly bólek zań qabyldadyq. Endi bir dıplom alyp, bir mamandyqpen ómir boıy jumys isteý múmkin emes. Óıtkeni álem ózgerip jatyr, ekonomıka ózgerip jatyr. Jasandy ıntellekt bizge kele qoıǵan joq, biraq aldaǵy 5 jylda bizdiń urpaǵymyz jasandy ıntellektpen básekege túsedi, sondyqtan eńbek naryǵy túbegeıli ózgeredi, – dedi J. Súleımenova Kazinform agenttiginiń «Bizdin orta» podkastynda.
Onyń aıtýynsha, kásiptik biliktilik týraly zańda osy daǵdylardy, biliktilikti arttyrý úshin árbir óńirde sertıfıkattaý ortalyqtaryn iske qosý, jańa jumys oryndaryn ashý, árbir óńirdiń óz eńbek naryǵyn saralaý múmkindigi bekitilgen.
Osy zańnan keıin Úkimet 2024-2029 jyldarǵa arnalǵan eńbek naryǵyn retteýge baılanysty úlken kontseptsııa qabyldady. Buryn bir ortalyqtan eńbek naryǵyn saralaıtyn bir ǵana Eńbek mınıstrligi bolsa, qazir árbir salalyq mınıstrlik óziniń óńirlik bólinisindegi kadr tapshylyǵyn, kadr suranysyn, jumys ózgeshelikterin ózderi rettep otyrady.
– Taǵy bir úlken másele – byltyr taksı, jetkizý qyzmeti sekildi platformalyq jumysshylar tarapynan kelispeýshilikter boldy. Sondyqtan biz «ıAndeks taksı» kompanııasymen óz platformasyna tirkelgen jumyskerlerdiń áleýmettik, salyqtyq tólemderin tóletý máselesin qarastyrdyq. Buǵan deıin taksı júrgizýshileri men kýrerlerdiń salyǵyna, medıtsınalyq saqtandyrýyna baılanysty kóp suraqtar bolatyn. Olar memleket tarapynan beriletin zeınetaqy men áleýmettik jarnalardan qaǵylyp otyrdy. Bul eńbek naryǵynyń teńgerimsizdigine alyp keldi. Osy máseleni sheshý úshin eki zańnamalyq sheshim qabyldandy, - dep tolyqtyrdy Májilis depýtaty.
Osyǵan deıin Májilis depýtaty kolledjderde shabandoz ben atbegi daıyndaýdy usynǵan bolatyn.