Endi bıznesti tekserýsiz jabýǵa bolady – jańa tetik
ASTANA. KAZINFORM — Astana qalasy boıynsha Memlekettik kirister departamentiniń málimetinshe, Qazaqstanda mıkro jáne shaǵyn bıznes sýbektileri úshin qyzmetin toqtatý tártibi jeńildetilgen. «Taza paraq» tetigi sheńberinde belgili bir sharttar saqtalǵan jaǵdaıda bıznesti kameraldyq baqylaýsyz jabýǵa múmkindik beriledi. Bul týraly Astana qalasynyń ákimdigi jazdy.
Atalǵan tártip myna talaptar boıynsha júrgiziledi:
- QQS boıynsha tirkeý esebinde bolmaý;
- salyqtar men áleýmettik tólemder boıynsha bereshegi joq;
- jekelegen qyzmet túrleri boıynsha tirkelmegen.
Kórsetilgen sharttar saqtalǵan jaǵdaıda qyzmetin toqtatý kezinde kameraldyq baqylaý júrgizilmeıdi. Bul ereje eseptilik 2025 jylǵy 17 jeltoqsanǵa deıin tapsyrylǵan jáne 2026 jylǵy 1 qańtarǵa deıingi salyq kezeńderine qatysty bolǵan jaǵdaıda qoldanylady.
Rásimdi aıaqtaý úshin salyq organyna myna qujattardy usyný qajet:
- qyzmetti toqtatý týraly ótinish;
- taratýǵa baılanysty salyq eseptiligi;
- baqylaý-kassalyq mashınany (BKM) esepten shyǵarý týraly ótinish.
Vedomstvoda jeńildetilgen tártip tek belgilengen talaptar tolyq saqtalǵan jaǵdaıda ǵana qoldanylatyny atap ótildi.
Sharttar saqtalmaǵan jaǵdaıda qyzmetti toqtatý kameraldyq baqylaý júrgizý arqyly jalpy tártippen júzege asyrylady.
Eske sala keteıik, buǵan deıin Memlekettik kirister komıteti kollektorlyq qyzmet salasynda tekseris júrgizip, 11,8 mlrd teńge tabysty jasyrý deregin anyqtaǵan edi.
