Endi barlyq stýdent jasandy ıntellekt pánin oqıdy
ASTANA. KAZINFORM – Qazaqstannyń joǵary oqý oryndarynda jasandy ıntellektini oqytý aýqymy keńeıip keledi. Endi mamandyǵyna qaramastan barlyq stýdent jasandy ıntellekt pánin oqıdy. Bul týraly Ǵylym jáne joǵary bilim vıtse-mınıstri Dınara Şeglova Ortalyq kommýnıkatsııalar qyzmetinde ótken baspasóz máslıhatynda aıtty.
Onyń sózinshe, 2025 jyldan bastap jasandy ıntellekt daǵdylary barlyq bilim berý baǵdarlamasyna engizilgen.
— Qazir 95 ýnıversıtet oqý josparlaryna jasandy ıntellekt pánderin qosty. Bul 4 myńnan astam bilim berý baǵdarlamasyn qamtıdy. Sonymen qatar 30 joǵary oqý ornynda jasandy ıntellekt baǵyty boıynsha 42 bilim berý baǵdarlamasy iske asyrylyp jatyr. Professor-oqytýshylar quramynyń 54%-y jasandy ıntellekt salasynda biliktiligin arttyrdy, — dedi vıtse-mınıstr.
Sondaı-aq joǵary oqý oryndarynda jasandy ıntellektini qoldaný standarty bekitilip, dıssertatsııa ázirleý kezinde ony paıdalanýdy retteıtin tolyqtyrýlar engizilgen.
Budan bólek, barlyq joǵary oqý orny úshin jasandy ıntellektini qoldanýdyń negizgi kórsetkishteri bekitildi.
Aıta keteıik, elimizde 2030 jylǵa qaraı JI salasynda 10 myń maman daıyndaý kózdelip otyr.
