Endi aıyppul salynǵanda 25% komıssııa alynbaıdy – Ádilet mınıstrligi
ASTANA. KAZINFORM – Ortalyq kommýnıkatsııalar qyzmeti alańynda ótken brıfıngte Ádilet vıtse-mınıstri Bekbolat Moldabekov atqarýshylyq notarıaldyq jazbany tsıfrlandyrý jáne atqarýshylyq is júrgizýdi avtomattandyrý týraly aıtty.
Onyń sózinshe, atqarýshylyq notarıaldyq jazbany tsıfrlandyrý jobasy azamattardyń ótinishteri men shaǵymdaryn taldaý negizinde ázirlengen.
– Biz azamattardyń notarıýstardyń keı jaǵdaıda sýdıanyń rólin atqaryp ketkenine qatysty shaǵymdarynyń kóbeıgenin baıqadyq, – dedi Bekbolat Moldabekov.
Ol buǵan deıin boryshkerge poshta arqyly habarlama jiberiletinin, alaıda azamat 10 kún ishinde qarsylyq bildirmese, onyń shoty buǵattalatynyn atap ótti.
– Azamattar mekenjaıyn aýystyryp, basqa jaqqa ketip qalýy múmkin, keıde hattar ýaqytynda jetpeı jatatyn. Sonyń saldarynan kóptegen shaǵymdar men sot daýlary týyndady. Biz arnaıy jeke kabınet jasadyq. Qazir azamatqa SMS-habarlama keledi. Eger qarsylyǵyńyz nemese tólem jasaǵanyńyzdy dáleldeıtin chek bolsa, ony sol jerge tirkeı alasyz. Osy servıs iske qosylǵaly beri Ádilet mınıstrligine kelip túsetin azamattardyń ótinishteri 30%-ǵa azaıdy, – dedi vıtse-mınıstr.
Sonymen qatar ol atqarýshylyq is júrgizýdi tsıfrlandyrý aıasynda «robot sot oryndaýshysy» engizilgenin jetkizdi.
– Bul – tolyqtaı jasandy ıntellekt negizinde jumys isteıtin júıe. Ol jeke sot oryndaýshysynyń qyzmetin atqarady jáne azamattardyń qarajatyn únemdeýge múmkindik beredi. Búginde bul júıe halyqqa 3–4 mlrd teńge únemdeýge kómektesti, – dedi ol.
Spıkerdiń aıtýynsha, robottyń jumys isteý tártibi de jeńildetilgen.
– Mysaly, buryn «Sergek» kamerasynan nemese basqa júıeden aıyppul kelse, ony bir aı ishinde tóleý qajet bolatyn. Eger osy merzimde tólenbese, is jeke sot oryndaýshysyna beriletin. Olar shottardy buǵattap, hat joldap, qońyraý shalatyn. Endi osynyń barlyǵyn robot atqarady. Biraq basty aıyrmashylyǵy – buryn azamat aıyppul somasynan bólek, jeke sot oryndaýshysyna 25% tóleýge mindetti edi. Al robot eskertý jasap, aptasyna bir ret habarlama jiberip, aıyppuldy qosymsha shyǵynsyz tóleýdi usynady. Osylaısha azamattar 25% qosymsha tólemnen bosatylady, – dedi Bekbolat Moldabekov.
Buǵan deıin, májbúrlep oryndatýdy memlekettik jáne jeke sot oryndaýshylar, sondaı-aq ońaılatylǵan is júrgizý sheńberinde tsıfrlyq sot oryndaýshylar júzege asyratynyn jazǵanbyz.
