Endi avtokólikter Almatyǵa aqy tólep kiredi

ALMATY. KAZINFORM – Almatyǵa kiretin avtokólikter aqy tólese ǵana kire alatyn bolady. Qala bıligi bul bastama jol qozǵalysyn jeńildetip, ekologııalyq jaǵdaıdy jaqsartady dep otyr. Bul týraly Jibek Joly arnasynyń jańalyqtarynda aıtyldy. 

Aldaǵy jazda qala ortalyǵyndaǵy avtoturaq baǵasy da qymbattaıdy. Bul shara qanshalyqty tıimdi bolmaq, jáne qala turǵyndary buǵan ne deıdi?

Resmı derekke sáıkes, kún saıyn Almatyǵa qala syrtynan 250 myńǵa jýyq avtokólik kiredi. Bul keptelis, aýa lastanýy jáne avtoturaq tapshylyǵyna ákelip soǵady. Máseleni sheshý úshin bılik ekologııalyq standarttarǵa saı emes kólikter úshin qalaǵa kirýdi aqyly etýdi usynyp otyr.

— Birinshiden, biz avtoturaq baǵasyn edáýir kóteremiz. Bul álemniń iri qalalarynda keńinen qoldanylatyn tájirıbe. 2027 jyldan bastap alǵashqy shekteýler engizile bastaıdy, biraq olar tólem júıesi arqyly júzege asyrylady. Mysaly, eger kólik Almatyda tirkelgenimen, ekologııalyq standarttarǵa saı kelmese, onda keıbir aımaqtarǵa, atap aıtqanda, Shyǵys aınalma jolyna shyǵys jaǵynan kirý aqyly bolýy múmkin, — deıdi Almaty qalasynyń ákimi Erbolat Dosaev. 

Mundaı júıe basqa elderde, mysaly, Londonda bar. Ol jerde qala úsh aımaqqa bólinip, ekologııalyq talaptarǵa saı kelmeıtin kólikter úshin belgili bir jerlerge kirý aqyly etilgen.

— Jasyl aımaqqa erkin kirýge jáne avtokólikti turaqqa qoıýǵa bolady. Sary aımaqqa kirý úshin shamamen 20 fýnt sterlıng tóleý qajet. Al qyzyl aımaq qalanyń eń ortalyǵy, oǵan kirý úshin 40 fýnt sterlıng tóleý kerek, — deıdi avtoekspert Arsen Shakýov. 

Aıta keteıik, elektromobılder men ekologııalyq taza kólikterge esh shekteý bolmaıdy. Sondaı-aq, bıylǵy kúzde ıntellektýaldy kólik júıesi iske qosylyp, qalaǵa kirýdi qadaǵalaý mehanızmi engiziledi.

— Bul tájirıbeni qoldanýǵa bolady, ásirese, ony birden emes, bir-eki jyl ishinde kezeń-kezeńimen engizý josparlanyp otyrǵanyn eskersek. Osy ýaqyt aralyǵynda Qaskeleń, Talǵar jáne Qonaev baǵyttarynda kólik-aýystyryp otyrý toraptary salynatyn bolady, — deıdi avtoekspert Arsen Shakýov. 

Qabyldanǵan sharalar kólik qozǵalysyn jeńildetip, ekologııany jaqsartýǵa baǵyttalǵan, biraq olardyń tıimdiligi ýaqyt enshisinde jáne turǵyndardyń beıimdelýine baılanysty.

Buǵan deıin habarlanǵandaı, Almatydaǵy avtoturaq týraly sarapshylar pikir bildirdi.