Endi astanalyqtar Tashkentke eki saǵatta ushyp bara alady

ASTANA. KAZINFORM — Astana halyqaralyq áýejaıy Centrum Air avıakompanııasy Tashkent — Astana — Tashkent baǵyty boıynsha turaqty jolaýshylar reısterin iske qosatynyn habarlaıdy.

Atalǵan baǵyttyń ashylýy jazǵy áýe qatynasy kestesi aıasynda 2026 jylǵy 29 naýryzǵa josparlanǵan.

— Reıster aptasyna úsh ret — dúısenbi, juma jáne jeksenbi kúnderi zamanaýı ári jaıly Airbus A320 áýe kemelerimen oryndalady. Ushý ýaqyty shamamen 2 saǵatty quraıdy. Baryp-qaıtý áýe bıletteriniń eń tómengi baǵasy bagajsyz shamamen 85 myń teńgeden bastalady, — delingen habarlamada.

Jańa baǵyttyń ashylýy Qazaqstan men Ózbekstan arasyndaǵy áýe qatynasyn keńeıtip, iskerlik, týrıstik jáne otbasylyq saparlar úshin qosymsha múmkindikter usynady. 

Osyǵan deıin Tashkent — Atyraý baǵyty boıynsha jańa áýe reısi iske qosylatynyn jazdyq.