Endi Astana Hub-qa tirkelgen kompanııalar múshelik jarna tóleıdi
ASTANA. KAZINFORM — Májilis Astana Hub pen Innovatsııalyq tehnologııalar parkin biriktirý týraly zań jobasyn birinshi oqylymda maquldady.
Qujatty depýtattarǵa tanystyrǵan Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev atalǵan zań jobasy tórt negizgi bloktan turatynyn aıtty.
Onyń birinshi blogy Astana Hub pen Innovatsııalyq tehnologııalar parkiniń fýnktsııalaryn bir jerde shoǵyrlandyrýǵa baǵyttalǵan.
— Memlekettik qoldaýdyń barlyq sharalaryn Astana Hub ınnovatsııalyq klasterlik qoryna berý usynylady. Bul ekojúıeniń tıimdiligin kúsheıtedi. Zań jobasynyń maqsaty — IT-salada joǵary nátıje kórsetken Astana Hub úzdik tájirıbelerin biriktirý ǵana emes, sonymen birge masshtabtaý, — dedi ol.
Mınıstrdiń sózinshe, qazir Astana Hub-qa múshe zańdy tulǵalar ortalyqqa tirkelip, jumys istegeni úshin kirisiniń 1 paıyzyn ǵana alym retinde tólep otyr. Endi osy alymnyń ornyna múshelik jarna tetigi engiziledi.
— Qordyń kommertsııalyq emes mártebesine sáıkes kelý úshin jáne ony úlken ashyqtyqpen qamtamasyz etý úshin «alymdar men tólemder» termınin «múshelik jarnalarǵa» aýystyrý usynylady. Osylaısha salyqty qaltadan qaltaǵa aýystyrý bolmaıdy jáne ınnovatsııalyq sektordy qoldaý úshin qosymsha resýrstar paıda bolady, — dedi Jaslan Mádıev.
Qujattyń úshinshi blogy AstanaHub.com bazasynda ulttyq ınnovatsııalyq júıeniń biryńǵaı terezesin damytatyn tsıfrlyq platforma jasaqtalady.
Tórtinshi blok startap jobalardyń portfelin baǵalaý normalaryn Bıýdjet kodeksinen Kásipkerlik kodekske aýystyrýdy kózdeıdi.
— Qazir ınnovatsııalyq, onyń ishinde venchýrlik qyzmet Kásipkerlik kodekste reglamenttelgen. Sondyqtan, jobalardy portfeldik baǵalaý boıynsha qoldanystaǵy normany Bıýdjettik kodeksten Kásipkerlikke aýystyrý usynylady. Bul norma venchýrlyq qorlardyń jumys nátıjesin búkil ınvestıtsııalyq portfeldiń kiristiligi negizinde baǵalaýǵa arnalǵan. Osylaısha, ózgerister tehnıkalyq sıpatqa ıe jáne zańnamanyń jańa redaktsııasynda qoldanystaǵy tásildi saqtaýǵa baǵyttalǵan, — dedi vedomstvo basshysy.
Aıta ketý kerek, jyl basynda Astana Hub rezıdentteriniń 90-nan astam elge IT-qyzmet eksporttaǵany belgili bolǵan edi.