Endi ár qurylystyń óz «JSN»-i bolady

ASTANA. KAZINFORM — Ónerkásip jáne qurylys mınıstri Ersaıyn Naǵaspaev qurylys nysanynyń biregeı nómiri ne úshin engiziletinin túsindirdi.

— Nysannyń biregeı nómiri degen shynymen de jańashyldyq dep aıtýǵa bolady. Kúndelikti ómirmen salystyrsaq, nysannyń biregeı nómiri degen ár adamda bar JSN-ge uqsaıdy. Biregeı nómir nysanǵa memlekettik qala qurylysy kadastrynda jobalaý kezeńinde beriledi. Ol nómir avtomatty túrde beriledi jáne nysannyń búkil «ómir» tizbeginde onymen birge júredi — josparlaý kezeńinde, saraptama kezeńinde, qurylys kezeńinde, tipti ýtıldeý kezeńinde birge bolady, — dedi mınıstr Májilis depýtatynyń suraǵyna bergen jaýapta.

Onyń sózinshe, bul qurylys sapasyn qadaǵalaýǵa da ońtaıly.

— Mynandaı mysal keltireıin. Qazir keıbir nysan qoldanysqa berilgennen keıin menshik ıesi ony jetildirgisi kelse, qandaı da bir ózgertý engizgisi kelse, bastapqy qujattaryn taba almaı jatady. Óıtkeni qurylys bitken soń ótkizgen qujattar joǵalǵan bolyp shyǵady. Endi nysandy belgili bir ýaqyt ótkennen keıin jańǵyrtqyńyz kelse, biregeı nómir boıynsha júıeden búkil qujatyn taba alasyz. Bastapqy jobasy qandaı bolǵanyn, qandaı materıaldar men tásilder qoldanylǵanyn kóre alasyz. Osy biregeı nómir arqyly tsıfrlyq formatta nysandy qadaǵalap otyrýǵa bolady, — dedi Ersaıyn Naǵaspaev.

Aıta keteıik, dál qazir Májilis qurylys qyzmetin qaǵazbastylyqtan aryltatyn qujatty qarap jatyr.