Endi Almatyda týrısterdi taýǵa shyǵarda tirkeýden ótkizedi
ALMATY. KAZINFORM — Almatyda taýǵa shyǵardan buryn týrısterdi endi mindetti túrde tirkeýden ótkizedi. Qutqarýshylar men týrızm basqarmasynyń ókilderiniń aıtýynsha, bul bastama qaýipsizdikti arttyryp, oqys oqıǵanyń sanyn azaıtý úshin qolǵa alynǵan.
— Týrıster arasynda mundaı nárse joq bolǵanymen, biz ony engizgeli otyrmyz. Tótenshe jaǵdaılar departamentimen, Almaty alpınızm federatsııasymen birlesip osy máseleni qarastyryp jatyrmyz. Jobalar pýly bar, alda toptasyp sapar shegetinderdi tirkeı bastaımyz. Bul eń aldymen qaýipsizdik úshin kerek, — dedi Almatynyń týrızm basqarmasynyń týrıstik ınfraqurylymdy damytý bóliminiń basshysy Dáýren Erǵalıev.
Onyń aıtýynsha, qalada taýly baǵyttardy abattandyrý men qaýipsiz ınfraqurylym qurý jumystary da qatar júrgizilip jatyr eken.
— Qazirgi tańda 1 000 shaqyrymnan astam taý joly tsıfrlandyryldy, onyń shamamen 850 shaqyrymy abattandyrylǵan. Baǵyttaýshy belgiler, navıgatsııalyq kórsetkishter ornatylyp, demalys aımaqtary men qaýipsizdik elementteri jabdyqtalǵan. Byltyr qosymsha 100 shaqyrym súrleý abattandyrylsa, bıyl taǵy 350 shaqyrymdy qamtý josparlanyp otyr. Sondaı-aq tótenshe jaǵdaıda qurylǵylardy qýattaýǵa múmkindik beretin kún panelderi bar kempıng aımaqtary jasaldy, — dedi Dáýren Erǵalıev.
Qutqarýshylardyń aıtýynsha, taýdaǵy oqys oqıǵanyń kópshiligi týrısterdiń jolǵa daıyndyqsyz shyǵyp, qaýipsizdik erejesin elemeýinen bolady eken.
— Kıim men aıaq kıimdi durys tańdamaıdy, jolǵa shyǵarda qolaısyz ýaqytty tańdap alady. Adamdar kóbine kún raıy men júretin jolynyń kúrdeliligin eskermeıdi. Saparǵa aldyn ala daıyndalyp, shama-sharqyna qarap alý kerek. Bul qaýipti jaǵdaıdyń aldyn alýǵa kómektesedi, — deıdi QR TJM «Barys» respýblıkalyq qutqarý qyzmetiniń bas qutqarýshysy Vadım Pak.
Ol sondaı-aq jabaıy janýarlarmen kezdesken jaǵdaıda ózin qalaı ustaý keregin eske saldy.
— Janýarlardy úrkitpeý kerek, dúrlikpeýi kerek. Sabyr saqtap, aqyryn-aqyryn sheginshektep, araqashyqtyqty saqtaý qajet. Jaqyndap, sýretke túsip, nazar aýdartýǵa tyryspaý kerek. Bul solardyń tirshilik etetin ortasy, sondyqtan shekten shyqpaǵanyńyz durys, — dedi Vadım Pak.
Sonymen qatar qutqarýshylar taýǵa shyǵarda jaqyn-jýyqtaryna baǵytyn habarlap, ózimen birge qajetti zattardy alyp júrýi kerek ekenin aıtty.
— Saparǵa shyǵarda qaıda baratynyńyzdy, qashan oralatynyńyzdy mindetti túrde habarlaý aıtý kerek. Ózińizben birge dári qobdıshasyn, sý, azyq-túlik pen jyly kıim ala júrińiz. Navıgatsııany qoldana bilý kerek, kún raıyna da kóz júgirtip qoıǵan artyq bolmaıdy, — dedi Vadım Pak.
Mamandardyń aıtýynsha, osy qarapaıym erejelerdi saqtaý men týrısterdi tirkeý sııaqty jańa erejelerdi engizý taýdaǵy demalysty qaýipsiz etip, tótenshe jaǵdaıdyń sanyn azaıtýǵa sep bolmaqshy.
Eske salaıyq, buǵan deıin Almaty taýlaryndaǵy týrısterge arnalǵan úıshikterdiń jaı-kúıi týraly jazǵan edik.