Endi alkogol jumys ýaqyty shekteýli arnaıy dúkenderde de ǵana satylýy múmkin

ASTANA. KAZINFORM — Іshki ister mınıstrligi alkogol ónimderin satýǵa baqylaýdy kúsheıtýdi usynyp otyr. 

Atalǵan máseleni Úkimet janyndaǵy quqyqbuzýdyń aldyn alý jónindegi vedomstvoaralyq komıssııanyń otyrysynda Іshki ister mınıstri Erjan Sadenov kóterdi. 

— Qoǵamdyq oryndarda alkogol ishýge qatysty 107 myń quqyqbuzýdyń joly kesildi. 11 myń adamǵa alkogol qoldanýǵa tyıym salyndy. Qoǵamda ishimdikke tózbeý jaǵdaıyn qalyptastyrýǵa jurtshylyq tartylyp jatyr. Búginde 402 eldi meken turǵyndary alkogolden bas tartty, — dedi Erjan Sadenov komıssııa otyrysynda.

Sondaı-aq maskúnemdik máselesin sheshý keshendi tásili qajettigi aıtyldy.

Іshki ister mınıstrliginiń málimetine súıensek, bıyl polıtsııa alkogol aınalymy salasynda 7 myńǵa jýyq zań buzýshylyqtyń jolyn kesti. Kásipkerlik sýbektilerine 370 mln teńge kóleminde aıyppul salyndy, 2 252 mekeme lıtsenzııasynan aıyryldy.

— Alaıda keıbir kásipkerler lıtsenzııany basqa tulǵalardyń atyna rásimdep nemese basqa mekemeniń atyn jamylyp, táýlik boıy alkogol satýdy jalǵastyryp jatyr, — delingen habarlamada.

Osy oraıda komıssııa otyrysynda birqatar usynys aıtyldy:

— lıtsenzııa berýge qoıylatyn talaptardy kúsheıtý;
— alkogol ónimderin tek jumys ýaqyty shekteýli arnaıy dúkenderde satýdy qarastyrý.

Aıta keteıik, búginde birqatar óńir aýyldarynda ishimdikten jappaı bas tartý dástúri qalyptasyp keledi. Taıaýda Ulytaý oblysynda 15 aýyl ishimdikten bas tartty. 

Odan bólek Túrkistanda ishimdiksiz ómir saltyn tańdaǵan aýyldar qatary tolyqty.