Endi áleýmettik tólemderdi taǵaıyndaýǵa JI kómektesedi — Eńbek mınıstri
ASTANA. KAZINFORM — Tamyz aıynan bastap ákimdikter kórsetetin birqatar memlekettik qoldaý sharalary jasandy ıntellekt kómegimen taǵaıyndala bastaıdy. Bul týraly Úkimet otyrysynda Eńbek jáne halyqty áleýmettik qorǵaý mınıstri Asqarbek Ertaev málim etti.
Mınıstrdiń aıtýynsha, vedomstvo áleýmettik-eńbek salasyna tsıfrlandyrý men jasandy ıntellekt tehnologııalaryn kezeń-kezeńimen engizip jatyr. Negizgi maqsat — memlekettik qyzmetterdi azamattar úshin barynsha qoljetimdi etip, ótinish berý qaǵıdatynan proaktıvti modelge kóshý.
— Bul model aıasynda memleket azamattyń qoldaýǵa muqtaj ekenin aldyn ala anyqtap, qajetti nátıjege qol jetkizgenshe súıemeldeıdi, — dedi Asqarbek Ertaev.
Osy baǵyttaǵy negizgi jobalardyń biri — Áleýmettik qorǵaý sharalarynyń biryńǵaı tsıfrlyq platformasy. Júıe áleýmettik qoldaý sharalaryn taǵaıyndaý, sheshim qabyldaý jáne tólem júrgizý protsesterin biriktiredi.
— Buryn azamattar túrli memlekettik organǵa júginip, qajetti anyqtamalar men qujattardy jınap, olardyń tekserilýin kútýge májbúr bolatyn. Endi bir ǵana ótinish berý jetkilikti. Qajetti málimetter memlekettik aqparattyq júıelerden avtomatty túrde alynyp, sheshim qalyptasady jáne tólem júzege asyrylady, — dep tolyqtyrdy mınıstr.
Mınıstrdiń málimetinshe, bıylǵy maýsymnan bastap platforma elimizdiń barlyq 20 óńirinde ónerkásiptik paıdalanýǵa engizilgen. Qazir onyń aıasynda jergilikti atqarýshy organdar kórsetetin 13 áleýmettik qoldaý sharasy tsıfrlyq formatta usynylyp otyr.
Olardyń qatarynda emdelýge jáne saýyqtyrýǵa beriletin kómek, gemodıalız apparatyn paıdalanatyn І toptaǵy múgedektigi bar azamattardy qoldaý, tirek-qımyl apparaty aýrýlaryn emdeý, múgedektigi bar balalarǵa kómek kórsetý, sozylmaly búırek jetkiliksizdigi bar adamdardy qoldaý, dári-dármekpen qamtamasyz etý, sanatorıılik-kýrorttyq emdeý, kommýnaldyq qyzmetter aqysyn tóleý, turǵyn úıdi kútip ustaý, telefon úshin abonenttik tólem, turmystyq qajettilikter, qatty otyn satyp alý jáne aqshalaı kómek berý sharalary bar.
A. Ertaevtyń aıtýynsha, tamyz aıynan bastap ákimdikter kórsetetin merekelik jáne ataýly kúnderge arnalǵan birjolǵy tólemder jasandy ıntellekt kómegimen taǵaıyndalady.
— Júıe tólem alýshylardy aldyn ala anyqtap, taǵaıyndaý jobasyn qalyptastyrady. Al tólemdi taǵaıyndaý jónindegi túpkilikti sheshimdi jergilikti atqarýshy organ qabyldaıdy, — dedi mınıstr.
Sondaı-aq qyrkúıek aıynda azamattarǵa eGov Mobile qosymshasy arqyly ótinish berý múmkindigi usynylady. Al qazan aıynan bastap memlekettik qoldaý sharalaryn azamattardyń naqty qajettigi men muqtajdyq deńgeıine qaraı nysanaly túrde taǵaıyndaý úshin JI quraldaryn engizý josparlanyp otyr.
Aıta keteıik, búgin Úkimet músheleri jasandy ıntellekt negizindegi memlekettik qyzmetter ekojúıesi baǵytyndaǵy jumystardy talqyǵa salady.
