Endi 5-synyptan bastap oqýshylar jeke qaýipsizdigin qorǵaýdy úırenedi
ASTANA. KAZINFORM — 2026 jyldyń 9 aıynyń qorytyndysy boıynsha elde balalarǵa qatysty quqyqbuzýshylyqtar sany 3,7%-ǵa azaıdy. Oń dınamıka elimizdiń birqatar óńirinde, sonyń ishinde Jambyl, Atyraý, Shyǵys Qazaqstan jáne Aqtóbe oblystarynda baıqalady, dep habarlaıdy Oqý-aǵartý mınıstrliginiń baspasóz qyzmeti.
Mınıstrlik balalardyń quqyqtaryn qorǵaý salasyndaǵy memlekettik saıasattyń is júzinde júzege asyrylýyn baǵalaý úshin óńirlerge baryp, monıtorıng júrgizip jatyr. Buǵan deıin kámeletke tolmaǵandardyń qatysýymen qoǵamdyq rezonans týdyrǵan oqıǵalar bolǵan nemese profılaktıkalyq jumysty uıymdastyrýda kemshilikter anyqtalǵan óńirlerge erekshe kóńil bólinedi. Atap aıtqanda, Jambyl, Batys Qazaqstan, Atyraý oblystarynda jáne Jetisý oblysynda monıtorıng júrgizildi. Onyń nátıjeleri bilim berý uıymdarynda balalardy qorǵaýdyń qoldanystaǵy tetikterin is júzinde qoldanýdy kúsheıtý qajettigin kórsetti.
Іshki ister mınıstrligimen birlesip, balalarǵa qatysty quqyq buzýshylyqtardyń aldyn alý júıesin jetildirý jumysy jalǵasyp jatyr. Qaýip-qaterlerdi erte anyqtaýǵa, kámeletke tolmaǵandarǵa jeke qajettilikterine saı qoldaý kórsetýge jáne olardyń quqyqtarynyń buzylý faktilerine ýaqtyly den qoıýǵa erekshe kóńil bólinedi. Jańa tásilderdi pılottyq engizý barysynda pedagogterdiń kásibı qyzmetin baǵalaýǵa balalarǵa qatysty quqyqqa qaıshy áreketterdi ýaqtyly anyqtaý kórsetkishin qosý kózdelgen.
— 2026-2027 oqý jylynan bastap 5-11 synyp oqýshylary úshin mindetti «Jeke qaýipsizdik» kýrsy engizildi. Oqýshylar qaýipti jaǵdaılardy tanýdy, jeke shekaralaryn qorǵaýdy, qaýipsiz minez-qulyq erejelerin saqtaýdy jáne der kezinde kómek suraýdy úırenedi, — delingen habarlamada.
Budan buryn BQO-da mektep ishinde tóbelesken oqýshy qyzdar jaýapqa tartylǵanyn jazǵanbyz.
